DILI, 04 janeiru 2022 (TATOLI)–Ministru Transporte no Komunikasaun (MTK), José Agustinho da Silva, hateten, tripulante timor-oan hamutuk na’in-13 ne’ebé serbisu iha ró-ahi Berlin-Ramelau toman ou familiár ona ho fasilidade ró tanba hafoin halo lansamentu, halo ona operasaun ba-mai Dili – Oé-cusse dala-haat ona.
“Ha’u hato’o ba Primeiru-Ministru kona-ba kondisaun Berlin-Ramelau. Ita-nia tripulante timor-oan sira komesa familiár ona ho ekipamentu eletróniku ne’ebé modernu tebes iha ró ne’e. Ekipamentu balun ho versaun Europeia no balun Ázia, hanesan hosi Koreia Súl no Japaun, entaun presiza tempu atu halo adaptasaun, nune’e kona-ba esperiénsia ha’u hanoin sira iha ona tanba ró halo operasaun dala-haat ona,” Ministru informa hafoin reuniaun ho Xefe Ezekutivu, iha Rezidénsia Farol, tersa ne’e.
Notísia relevante: Ró-ahi Berlin-Ramelau hahú halo operasaun normál bá Oé-cusse semana ne’e
Aleinde ne’e, iha ona planu atu rekruta tan pesoál mekániku no eletrisista hodi halo kompletu kru, nune’e asegura operasaun ró-ahi, ne’ebé ho kapasidade tula pasajeiru 380 to’o 400.
Maski nune’e, iha mós difikuldade liga ba funsionamentu normál, katak oinsá maka Konsellu Administrasaun Autoridade Portuáriu Timor-Leste (APORTIL) bele fó atendimentu ba kru sira hanesan fornese kombustível, bee-moos, no atendimentu lojístiku ba tripulante sira atubele asegura movimentu.
“Agora ita presiza kuidadu ho sasán Estadu, atu nune’e bele fó atendimentu nafatin ba tempu naruk. Tanba ne’e nu’udar Ministru ha’u asegura hodi pro-ativu, kalan mós ha’u kontrola ró ne’e ninia paradeiru inklui atendimentu kru sira iha ró laran. Ninia objetivu maka asegura fasilidade Estadu, atu nune’e fó atendimentu ba populasaun ne’ebé halo movimentu uza meiu transporte marítima,” nia dehan.
Ministru fó ona orientasaun ba Konsellu Administrasaun APORTIL atu loke konkursu públiku ligadu ho loke kantina iha ró laran, nune’e bainhira pasajeiru sira halo viajen ho ró ne’e, bele sosa hahán iha fatin ne’e.
“Ha’u husu ona ba Konsellu Administrasaun atu aselera prosesu ne’e hodi responde ba nesesidade pasajeiru durante viajen,” nia tenik.
Jornalista : Antónia Gusmão
Editora : Julia Chatarina
