COVALIMA, 05 janeiru 2022 (TATOLI)—Segundu Komandante Polísia Nasionál Timor-Leste (PNTL) Munisípiu Covalima, Superintendente Albino Mauzinho informa, durante selebrasaun tinan foun iha Covalima ne’e PNTL rejista kazu ofensa integridade simples rua.
“Iha ámbitu selebrasaun festa tinan foun ba tinan 2022, ita rejista kazu ofensa integridade simples rua no kazu hirak ne’e ita haruka ona prosesu hodi lori ona ba tribunal. Hein de’it tribunál atu halo notifikasaun,” Albino Mauzinho hato’o ba Agência Tatoli, iha nia knar fatin, kuarta ne’e.
Aleinde rejista kazu ofensa integridade simples durante selebra tinan foun maibé iha tinan 2021 ne’e, PNTL Covalima mós rejista kazu hamutuk 172 no hosi númeru ne’e tipu kazu ne’ebè aas mak kazu ofensas integridade fíziku simples no agravadu, kazu violénsia doméstika no kazu kontra bandu mak hanesan sasán sira tama ilegál iha fronteira ne’ebè katégoria kazu fronteira laek.
“Ita hala’o servisu tuir regra no prosedimentu ne’ebè iha no ita halo koopersaun hamutuk ho ita nia joven sira liuhosi programa visibilidade envolvimentu no profisionál husi programa polisiamentu komunitáriu nian tuir estratéjika komandu jerál nian 2014-2018,” nia hateten.
Bazea vizaun estratéjia ne’ebè PNTL Covalima hala’o tuir Planu Anuál Munisípiu (PAM) ne’ebè tau atividade hotu ho nune’e konsege redús krime sira kompara ho tinan 2021 liubá ne’e.
“Kazu ne’ebè ita rejista iha 2021 ne’e, maiória ita lori ona ba tribunál no balun hetan ona desizaun hosi tribunál balun seidauk maibé ita rejista 100% iha Covalima. Ita la pendente iha komandu maibé kazu hotu ita rejista ona iha tribunál,” nia informa.
Atu redús kazu hirak ne’e PNTL Covalima mós hala’o sensibilizasaun ba autoridade lokál hamutuk ho komunidade hodi hasa’e kuñesementu kona-ba lei no prosesu atu hato’o kazu ba PNTL no ba Ministériu Públiku (MP).
“Ita labele halo sensibilizasaun ho másimu maibé ita bolu konsellu suku sira ita halo sensibilizasaun tanba iha teritoriu Timor laran ita enfrenta COVID-19,” nia haktuir.
Tanba ne’e, ba tinan ne’e sei aprezenta proposta ba komandu jerál PNTL atu kontinua realiza sensibilizasuan iha suku no aldeia sira kona-ba lei, prosesu hato’o keixa no estabelese prosedimentu iha Timor -Leste.
Durante ne’e PNTL hala’o servisu hodi halo atusaun ba kazu sira balun ne’ebé akontese iha vila maibé iha postu administrativu sira-ne’ebè la asesu transporte, nune’e PNTL to’o tarde maibé la’os sai obstákulu atu asegura seguransa ba komunidade Covalima.
“Komandu PNTL Covalima mós husu veteranu, joven no komunidade konta mós ita hotu nia kontribuisaun tanba seguransa iha ita hotu nia liman tuir espetativa hosi komandu. Covalima tenke hakmatek, nune’e Estadu bele hala’o dezenvolvimentu,” nia apela.
Jornalista : Celestina Teles
Editór : Cancio Ximenes
