BOBONARO, 04 janeiru 2022 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, hahú hosi fulan-janeiru to’o dezembru 2021 rejista eleitór foun hamutuk 3.346 iha postu administrativu neen.
Diretór STAE Bobonaro, Mariano Viegas Amaral, hateten, antes iha fulan-janeiru to’o outubru rejista eleitór foun menus tanba problema pandemia Covid-19.
Maibé tama fali iha fulan-novembru 2021 to’o dezembru konsege rejista eleitor barak tanba ekipa tún direita ba halo resensiamentu eleitorál no autaliza baze dadus kobre hotu postu administrativu neen.
“Ami STAE Bobonaro nia serbisu durante tinan 2021 rejista eleitor foun ba ita-nia sidadaun ne’ebé ho idade 17 ba leten hamutuk 3.346 kompostu hosi feto 1.573 no mane 1.773,” nia ko’alia iha Maliana, tersa ne’e.
Nia informa, eleitór atualizadu hahú hosi janeiru to’o dezembru 2021 rejista ema na’in-2.740 kompostu hosi feto 1.079 no mane 1661. Enkuantu iha 2021 STAE Bobonaro rejista eleitór hamutuk 6.086 no eleitor ne’ebé eliminadu mate ho kartaun dupla na’in-1.037.
Jornalista : Sérgio da Cruz
Editór : Evaristo Soares Martins
