DILI, 06 janeiru 2022 (TATOLI)– Prezidente Federation International Football Association (FIFA), Gianni Infantino, hato’o kongratulasaun ba klube Karketu Dili FC ne’ebé sai kampiaun iha jogu primeira divizaun Liga Futeból Timor-Leste (LFTL).
Prezidente FIFA hato’o kongratulasaun liuhosi karta ofisiál ba Prezidente Federasaun Futeból Timor-Leste (FFTL), Francisco Jerónimo no ba Klube Karketu Dili FC.
Notísia relevante: Manán Ponta Leste 1-0, Karketu sai kampiaun iha LFTL 2021
“Ida ne’e hanesan onra ba ami nia klube Karketu tanba hetan kongratulasaun ida hosi Prezidente FIFA, ida ne’e hanesan motivasaun extra ida ba ami atubele servisu másimu liután hodi hatudu prestasaun ida di’ak liu iha futuru,” Sekretáriu Jerál Karketu Dili FC, Elizeu Isaac hateten ba Agência TATOLI iha kampung Alor-Dili, kinta ne’e.
FIFA hato’o kongratulasaun ne’e la’ós ba de’it Timor-Leste, maibé ba mós klube hotu iha mundu bainhira sai kampiaun iha ida-idak nia liga lokál.
Karketu Dili sai kampiaun iha primeira divizasaun ba LFTL 2021, liuhosi luta naruk iha jornada hamutuk da-neen no konsege rekolla pontu 13.
Sai topu klasifikasaun iha primeira divizaun liuhosi luta naruk hanesan, jogu dahuluk kontra DIT ne’ebé konsege manán ho eskore 1-0, kontra Aitana manán 1-0, kontra AD SLB Laulara empate 1-1, kontra Lalenok United empate 1-1, kontra Assalam manán 1-0 no kontra Ponta Leste manán 1-0.
Notísia relevante: Dere DIT 1-0, Karketu kandidatu ba kampiaun
Jornalista : Hortencio Sanchez
Editór : Florencio Miranda Ximenes
