DILI, 06 janeiru 2022 (TATOLI)–Institutu Nasionál Formasaun Dosente Profisionál Edukasaun iha Timor-Leste (INFORDEPE) prepara ona vaga hamutuk 1.200 ba profesór permanente iha territóriu nasionál atu partisipa iha kursu baxarelatu iha instituisaun ensinu superiór sira.
Vise-Prezidente Gabinete Formasaun Akadémiku, Manuel Pinto, relata, INFORDEPE hahú realiza planu prioridade tinan 2022, ho diseminasaun kursu baxarelatu ba profesór permanente sira bazeia ba lei baze edukasaun.
“Ohin ita halo diseminasaun iha munisípiu Dili kona-ba kontinuasaun kursu baxarelatu ba profesór sira ne’ebé seidauk hetan baxarelatu, ne’ebé diseminasaun ne’e foka liu ba profesór permanente sira atubele tuir kursu, ho objetivu atu lori profesór sira tama iha lei baze edukasaun, ne’ebé profesór hotu mínimu tenke baxarelatu,” Vise-Prezidente hateten iha salaun Ian Martin INFORDEPE, Caicoli, kinta ne’e.
Notísia relevante: UNTL-INFORDEPE realiza judisium ba profesór baxarelatu 1.500 iha munisípiu hitu
Nune’e, profesór sira ne’ebé seidauk hetan grau akadémiku baxarelatu, hahú ohin bele hetan ona formuláriu hosi INFORDEPE no bele ba rejistu tuir ida-idak ninia eskola to’o loron 20 janeiru no eskola sei submete filafali formuláriu iha loron 25 janeiru 2022.
Daudaun INFORDEPE seidauk iha lista fixu kona-ba profesór permanente hira maka iha interese atu tuir kursu, maibé sei identifika liuhosi formuláriu ne’ebé distribui ona.
“Ita sei verifika profesór permanente hira maka iha interese tuir kursu baxarelatu liuhosi formuláriu ne’ebé ita distribui ona ba profesór sira, hafoin ita bele hatene dadus ne’e aumenta ka menus,” nia akresenta.
Enkuantu, orsamentu atu apoiu programa ne’e, prevee ona maibé seidauk hatene ho montante hira.
Programa diseminasaun kursu baxarelatu ne’e hato’o hosi Vise-Prezidente INFORDEPE, ho apoiu hosi Diretór servisu Edukasaun munisípiu Dili hodi fahe informasaun ba diretór no koordenadór eskola sira iha munisípiu Dili.
Jornalista : Tomé Amado
Editora : Julia Chatarina
