BOBONARO, 05 janeiru 2022 (TATOLI) – Diretór Servisu Saúde Munisípiu Bobonaro, João Barreto Cardoso, fó-sai katak sidadaun na’in-rua pozitivu Covid-19 iha postu administrativu Maliana hahú rekupera hafoin kumpre izolamentu durante loron rua.
“Ami hakarak informa de’it, ita-nia pasiente pozitivu na’in-rua oras ne’e faze rekuperadu ona, parese loron ida ka rua halo teste negativu bele sai ona ba uma,” nia informa ba jornalista sira, Soso, Maliana, kuarta ne’e.
Nia haktuir, ekipa vijilánsia sentinela Covid-19 munisípiu Bobonaro halo teste ba pasiente mane (YH) idade 11 nia família na’in-haat iha suku lahomea, rezultadu amostra teste PCR hatudu negativu.
Enkuantu kona-ba sidadaun insiál (EM) idade 16 hosi aldeia Pigalak I, suku Tapo-Memu, ekipa saúde ba buka-tuir família ne’ebé halo kontaktu besik, maibé la konsege halo teste swap ba família refere tanba uma mamuk.
“Agora Pasiente ne’e nia kondisaun di’ak ona, maibé ita presiza halo teste ba nia família, dalaruma hetan da’et hosi nia nune’e bainhira kona sira karik, labele da’et tutan ba ema seluk,” nia katak.
Notísia relevante: Saúde Bobonaro deteta kazu pozitivu Covid-19 foun rua
Jornalista : Sérgio da Cruz
Editór : Evaristo Soares Martins
