DILI, 07 janeiru 2022 (TATOLI)—Diretora Jerál Prestasaun Saúde, Ministériu Saúde, Odete da Silva Viegas, informa, Governu Estadu Unidu Amérika (EUA) oferese tan vasina Pfizer hamutuk doze 260.000 ba Governu Timor Leste.
“Vasina Pfizer ne’e sei to’o iha Timor-Leste iha fulan-janeiru ne’e. Vasina hamutuk doze 260.000 ne’e, Governu Estadu Unidu Amérika halo doasaun liuhosi fasilidade COVAX ho koordenasaun United Nations Chilidren’s Fund (UNICEF),” Diretora Jerál Odete, hateten ba jornalista sira iha Delta Nova, Dili, sesta ne’e.
Notísia Relevante: Vasina Pfizer doze 100.620 hosi EUA to’o iha Dili
EUA orgullu oferese vasina Pfizer ba Timor-Leste tanba hanesan asaun loloos belun no parseiru rohan laek atu serbisu hamutu kombate COVID-19 liuliu demostra apoia ba esforsu Governu atu salva timór-oan sira nia vida, partikularmente ba labarik ho idade 12 no menus hosi 18.
Nune’e, EUA antes ne’e halo ona doasaun vasina liuhosi fasilidade COVAX hamutuk doze 100.620, ne’ebé introdús ona vasina COVID-19 ba labarik sira tinan 12 to’o 18 mai kraik.
Hafoin to’o iha Timor-Leste, Governu liuhosi Ministériu Saúde lansa kedan vasina Pfizer doze dahuluk iha loron 27 outubru to’o novembru 19, hafoin 20 novembru tama ba doze daruak. Define doze daruak hosi vasina ne’e sei administra ho intervalu loron 21.
Tuir dadus hosi Ministériu Saúde kona-ba progresu imunizasaun COVID-19 ba sidadaun ho idade 12 no menus hosi 18 ne’ebé simu ona vasina Pfizer doze dahuluk hamutuk 35.712 ho 19,6% no ema ne’ebé mak simu ona doze daruak hamutuk 29.279 ho 16,1%.
Estudante ho idade 12 to’o 17 iha munisípiu Dili no munisípiu seluk simu ona vasina Pfizer hodi proteje ho efikásia 95% hosi infesaun sintomátika SARS-CoV-2.
To’o oras ne’e, Governu Timor Leste simu ona vasina COVID-19 hosi doadór sira hamtuuk 1.213.470, kompostu hosi vasina AstraZeneca hamutuk 1.012.850, vasina SINOVAC doze 100.000 no vasina Pfizer hamutuk doze 100.620.
Notísia Relevante: Labarik idade 12 to’o 17 simu ona vasina doze dahuluk 35.481
Jornalista : Felicidade Ximenes
Editór : Florencio Miranda Ximenes
