DILI,10 janeiru 2022 (TATOLI)— Prokuradór Jerál Repúblika (PGR,sigla portugés), Afonso Lopez, hateten, Prezidente Repúblika, Francisco Guterres Lú-Olo, enkoraja atu hakruk ba de’it lei hodi halo serbisu.
“Prezidente Repúblika husu Prokuradór Jerál Repúblika atu forsa nafatin hakruk de’it ba lei. Labele rona se de’it, labele rona boatu no lalika rona polítika sira,” Prokuradór Jerál Repúblika (PGR), Afonso Lopez, hateten ba jornalista sira hafoin ramata audénsia ho Xefe Estadu iha Pálasiu Prezidensiál, Bairru-Píté, segunda ne’e.
Notísia Relevante: Prezidente Repúblika enkoraja MP luta kontra krime organizadu
Alende ne’e, PGR informa totál kazu pendente ne’ebé rejista iha Ministériu Públiku durante tinan 2020 no 2021 ba PR Lú-Olo.
Nune’e, iha tinan 2020 MP rejista kazu hamutuk 2.749, hosi totál ne’e kazu pendente 54. Enkuantu iha tinan 2021, rejista kazu 5.135, ne’ebé konsege prosesu no halo finalizasaun ba kazu hamutuk 5.189 inklui ona kazu pendente balun iha 2020.
Notísia Relevante: Setembru, MP rejista prosesu kazu foun 483
Jornalista : Natalino Costa
Editór : Florencio Miranda Ximenes
