DILI, 11 janeiru 2022 (TATOLI)—Ministériu Agrikultura no Peska (MAP) tinan ne’e sei selebra loron nasionál floresta no ai-kameli iha loron 13 janeiru iha munisípiu Manututo.
“Iha selebrasaun ita sei lansa kuda ai-kameli iha rai ektare lima no munisípiu seluk lansa ektare rua, entaun kada ektare ida sei kuda ai-kameli hamutuk $1.667,” Diretór Jerál Floresta, Kafé no Planta Indústria, Raimundo Mau, hateten ba Agência TATOLI, iha ninia knaar fatin, Caicoli tersa ne’e.
Notísia relevante: MAP-UE selebra loron nasionál ai-kameli no floresta iha Aileu
Atividade kuda ai-kameli ne’ebé sei lansa iha munisípiu manatuto, hamutuk ho ai-horis balu hanesan ai-turi no ai-horis seluk ne’ebé fó nutrisaun ba ai-kameli no fó vantajen mós ba komunidade.
“Daudaun ita halo preparasaun ba rai ne’ebé atu kuda, tanba área ne’ebé atu kuda ne’e haliis entaun presiza hadi’a kondisaun rai. Ai-kameli oan ne’ebé atu kuda preparadu ona halo desde tinan kotuk,” nia akresenta.
Nune’e iha selebrasaun ne’e MAP mós koordena ona ho ona Prezidente Autoridade no Administradór Munisípiu sira 13 janeiru hamutuk ho dirijente servisu agrikutura no xefe reflorestasaun nian organiza ida-idak selebra iha ninia munisípiu.
“Ho atividade sira ne’e, ita mós hato’o ona proposta ida ba Primeiru-Ministru oinsá opta kondisaun ba entidade hotu atu garante no tau importánsia ba floresta no ai-kameli inklui ai-horis sira iha Timor-Leste,” nia dehan.
Kada tinan MAP oferese ai-kameli milliaun ida resin ba komunidade hodi ba kuda iha sira-nia kintal rasik, nune’e to’o tinan 20-25 ba leten sira presiza relata de’it iha serbisu ba floresta, atu kolleta produtu floresta ne’ebé sira kuda rasik.
“Ita-nia responsável mak kontinua presta prioridade ba ai-horis espesífika liu hanesan ai-kameli hodi garante promosaun,” nia dehan.
Nune’e, Diresaun Jerál Floresta, Kafé no Planta Industria kolabora ho parseiru internasionál hosi sentru estudu Austrália ninian, hanaran projetu icon hodi halo estudu ba ai-kameli atu sukat nia kreximentu idade.
“Projetu ne’e realiza iha Manduki Atabae, ne’ebé Governu konsege kuda ai-kameli hamutuk ektare 200, objetivu atu haree medida kresimentu ai-kameli, hahú preparasaun kuda to’o kolleta,” nia dehan.
Jornalista : Arminda Fonseca
Editora : Julia Chatarina
