DILI, 12 janeiru 2022 (TATOLI)— Timor-Leste sei partisipa iha jogu ka eventu internasionál Sudeste Aziátiku (Sea Games), iha loron 12 to’o 23 maiu 2022, ne’ebé realiza iha nasaun Vietname, nune’e atleta hosi modalidade hitu hahú prepara hodi tuir eventu internasionál ne’e.
Tuir lista modalidade desportiva ne’ebé sei partisipa eventu internasionál ne’e, kompostu hosi Atletizmu, Taekwondo, Voleiból Praia, Boxe, Karate-do, Natasaun no Futeból.
Nune’e, Sekretáriu Estadu Juventude no Desportu, Abrão Saldanha, hateten, Governu fó autorizasaun atu modalidade sira ba partisipa, maibé sei avalia no haree direta ba modalidade desportiva sira nia prestasaun tanba la hatudu prestasaun sei kansela.
“Governu apoia osan hamutuk $80.000 ba modalidade sira hodi halo preparasaun atu ba partisipa iha jogu ne’e, ami mós sei tuun direita hodi haree atleta sira nia prestasaun no ami sei halo selesaun ida-ida atu hili se mak bele ba no se mak labele ba,” SEJD Abrão hateten ba jornalista-sira iha SEJD-Lecidere, kuarta ne’e.
Iha sorin seluk, Sekretáriu Jerál Federasaun Karate-do Timor-Leste (FKTL), Antonio Carlos de Araújo, hateten, preparadu atu ba kompete iha eventu internasional ne’e.
“Ami prontu atu ba kompete iha eventu ne’e, ami nia atleta preparadu, maibé seidauk deside tanba Governu sei tun mai haree direta ne’ebé mak iha prestasaun di’ak foin haruka ba, ne’ebé ami prepara hodi hein,” dehan Antonio.
Entretantu, Prezidente Federasaun Atletizmu, Afránio Xavier Amaral, dehan atleta Atletizmu hamutuk na’in-neen mak sei ba partisipa iha eventu ne’e.
“Ami preparadu atu haruka atleta ba partisipa Sea Games, maibé Governu mak sei tun direita halo selesaun, entaun ami sei ko’alia ho tékniku sira atu prepara di’ak liután atleta sira atubele ba partisipa. Ita nian iha na’in-neen, kompostu hosi feto tolu no mane tolu, maibé ita mós sei halo kampionatu nasionál hodi deside atleta ne’ebé kualidade mak ba,” nia dehan.
Entertantu, eventu internasionál ne’e sei partisipa hosi nasaun sira iha ASEAN ho modalidade desportiva hamutuk 40.
Notísia Relevante: 2022, atleta karate-do partisipa Sea Games iha Vietnam
Jornalista : Hortencio Sanchez
Editór : Florencio Miranda Ximenes
