DILI, 12 janeiru 2022 (TATOLI)–Reitór Universidade Katólika Timorense São João Paulo II (UCT-SJP II), Joel Casimiro Pinto, relata, inskrisaun hahú loke tinan ne’e ba estudante foun.
“Ami simu estudante hosi 540 to’o 600, ne’e limitadu ona, ho valór mínimu 7,0. Tanba ita hakarak oferese buat di’ak ba Timór,” Reitór informa ba Agência TATOLI, iha ninia knaar fatin, kampus UCT, Balide, kuarta ne’e.
Prosesu inskrisaun hahú ona iha loron 10 janeiru no sei termina iha 11 fevereiru 2022, ne’ebé daudaun ne’e rejista ona kandidatu lubuk ida.
Inskrisaun ba tinan ne’e ba fakuldade haat no kursu 12 hanesan fakuldade Siénsia Edukasaun ho kursu literatura no arte, fakuldade Siénsia Umana ho kursu direitu, jestaun emprezariál, no kontabilidade.
Nune’e mós, fakuldade Siénsia Saúde ho kursu medisina jerál, kursu enfermajen no fakuldade Enjeñaria Agrikultura ho kursu agro teknolojia.
Tuir Reitór, maski estudante sira prienxe ona rekezitu iha prosesu inskrisaun, maibé sei tuir tan teste dala-rua hanesan eskritu no orál no estudante ne’ebé atu hakat ba teste orál tenke pasa lai iha teste eskrita.
“Maneira entrevista ne’ebé ami sei halo maka estudante sira hosi fakuldade medisina ninia, prosesu entrevista ne’e doutór sira mak sei fó, ba fakuldade direitu mos doutór lei sira mak sei fó entrevista. Intensaun mak atu haree ánimu, nune’e bainhira estudante liu duni prosesu rua ne’e universidade bele akompaña sira to’o ramata molok sai hosi fatin ne’e, la’ós lori de’it diploma maibé lori mós kualidade hodi kontribui ba sosiedade,” nia akresenta.
Notísia relevante: Arsebispu Dom Virgílio husu Dirijente Universidade Katólika serbisu ekipa
Tuir Reitór, bainhira kandidatu ida hili dalan tama iha UCT, mai atu estuda no aprende buat foun, tanba ne’e kuandu liu ona teste, sei hahú ho Semestre Pre Universidade (SPU), ne’ebé iha faze ne’e, semestre ida ho kursu portugés no inglés, nune’e bele realiza mehi ne’ebé Governu hakarak.
Enkuantu, alvu ba tinan dahuluk, UCT simu lai estudante la liu 600 no haree ba kondisaun karik tinan oin di’ak bele aumenta tan númeru inskrisaun.
Jornalista : Tomé Amado
Editora : Julia Chatarina
