DILI, 13 janeiru 2022 (TATOLI)—Sekretariadu Prezidente Autoridade Munisípiu Dili, António Moniz Clau informa, sesta (14/01) ne’e Primeiru-Ministru (PM), Taur Matan Ruak, sei hala’o diálogu ho autoridade lokál no komunidade iha munisípiu Dili.
Notísia Relevante: Xefe Governu sei vizita munisípiu hotu inklui RAEOA iha janeiru
“Apela ba líder komunitáriu sira katak iha loron 14 fulan ne’e, ita-nia Primeiru-Ministru, Taur Matan Ruak sei vizita no halo diálogu ho autoridade lokál no komunidade iha Sentru Konvensaun Dili (CCD, sigla portugés),” António Moniz Clau hateten ba Agência Tatoli, iha nia knaar fatin, Matadouru, Dili, kinta ne’e.
Tanba ne’e, nia husu ba líder komunitáriu sira hotu hahú hosi xefe suku to’o delegadu no delegada sira no komunidade atu partisipa másimu iha diálogu ne’e.
Iha diálogu ne’e, Autoridade Munisípiu Dili sei organiza de’it ba suku sira-ne’ebé besik iha Sentru Konvensaun Dili (CCD) hanesan suku Colmera, Caicoli, Mascarinhas, Santa Crúz no suku Gricenfor.
Ba suku seluk, Autoridade Munisípiu Dili sei la organiza komunidade tanba tuir termu referénsia ne’ebé simu hosi Gabinete Primeiru-Ministru, katak Munisípiu Dili sei organiza no mobiliza de’it mak estrutura suku inklui komunidade ne’ebé hela besik iha CCD.
“Ne’ebé, ba estrutura suku ho ita-nia komunidade sira-ne’ebé hela besik iha CCD ida ne’e mai hotu kedas la iha esepsaun. Tanba, diálogu ne’e aberta, saida de’it mak autoridade komunitária no komunidade nia preokupasaun livre atu hato’o ba Primeiru-Ministru, hanesan ulun ba Governu nia prontu atu rona saida de’it mak hato’o iha diálogu ne’e,” nia hateten.
Jornalista : Nelia Fernandes
Editór : Cancio Ximenes
