ERMERA, HEADLINE, MUNISÍPIU

PM husu komunidade tau importánsia ba ‘alerta’ hosi Meteorolojia

PM husu komunidade tau importánsia ba ‘alerta’ hosi Meteorolojia

Primeiru-Ministru (PM), Taur Matan Ruak, halo diálogu komunitáriu iha salaun Parokiál Gleno, kinta (13/01). Imajen TATOLI/Jogerjo Guterres

ERMERA, 13 janeiru 2022 (TATOLI)–Primeiru-Ministru (PM), Taur Matan Ruak, husu ba ba komunidade atu tau importánsia ba alerta hosi Diresaun Nasionál Meteorolojia Timor-Leste.

“Husu atu imi (komunidade) hotu iha territóriu nasionál, atu tau importánsia ba alerta hosi Meteorolojia ne’ebé loronloron informa liuhosi mensajen sira iha idaidak ninia telemóvel kona-ba dezastre naturál, ne’e atu husu ita atu prepara-an hodi hasoru dezastre,” PM hateten liuhosi diálogu komunitáriu iha iha salaun Parokiál Gleno, munisípiu Ermera, kinta ne’e.

Notísia relevante: Alerta, populasaun iha fatin risku kuidadu an hasoru fenómenu La liña

Xefe Ezekutivu dehan, dezastre naturál ne’ebé akontese iha tinan 2020 halo Estadu lakon osan millaun $50 no iha tinan 2021 akontese filafali halo Estadu lakon tan millaun $300.

“Dezastre naturál akontese estraga populasaun no Estadu nia sasán, akontese boot liu iha tinan 2021, ne’e hamate ema na’in-44. Propriedade Estadu balun to’o agora seidauk hadi’a hotu hanesan mota Comoro no fatin seluk. Tinan 2020 seidauk hadi’a hotu, akontese tan iha 2021, iha tinan ne’e nia rohan, ko’alia hela oinsá atu hadi’a, tanba ne’e loron-loron meteorolojia informa ba ita katak sei akontese udan no anin boot,” PM dehan.

Nune’e, Xefe Ezekutivu husu ba populasaun ne’ebé hela iha área risku hanesan rai-lolon, mota ninin, foho leten, tasi ibun atu kuidadu.

“Tenki kuidadu-an, labarik kiik sira, sasán, ho alerta ne’ebé fó sai bebeik ne’e signifika katak kualker momentu bele mosu, entaun ita tenki preparadu atu infrenta. Dezastre naturál perturba ita hotu, tanba dalan barak mak kotu, halo atividade Governu no komunidade labele la’o normál,” Xefe Governu hameno.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!