ERMERA, 13 janeiru 2022 (TATOLI)-–Tuir ajenda katak iha kinta (13/01) lorokraik tuku 14:00 Primeiru-Ministru (PM), Taur Matan Ruak, sei vizita ba munisípiu Aileu hodi hala’o diálogu komunitáriu, maibé Xefe Governu deside kansela tanba hakarak rona preokupasaun komunidade Ermera.
“Imi (Ermera) importante loos, tanba ne’e ha’u haruka kansela vizita ba iha Aileu, tanba hakarak rona barak imi-nia preokupasaun,” PM hateten iha ámbitu diálogu komunitáriu iha salaun Parokiál Gleno, munisípiu Ermera, kinta ne’e.
Tuir observasaun Agência TATOLI iha terrenu, iha atividade ne’e, bainhira Komisaun Organizadora limite komunidade no líder komunitáriu atu husu pergunta relasiona ho preokupasaun, iha momentu ne’ebá kedan Ministru Administrasaun Estatál (MAE), Miguel Pereira de Carvalho, halo intervensaun katak bele husu pergunta barak no labele limite tanba Governu deside loron tomak hakarak hala’o diálogu ho populasaun Ermera.
“Husu ba protokolu bele autoriza populasaun sira hato’o preokupasaun tanba Governu iha tempu atu rona,” Ministru dehan.
Durante diálogu, partisipante hosi populasaun baibain, veteranu, autoridade lokál, emprezáriu Ermera-oan no entidade seluk tan antusiazmu tebes ho prezensa Xefe Governu no ninia membru sira, ne’ebé maioria preokupasaun ligaho infraestrutura bázika no setór sosiál.
Diálogu ne’e hahú iha dadeer tuku 09:00 to’o kuaze tuku 15:00 seidauk ramata.
Antes ne’e, Xefe Governu hala’o ona vizita hodi halo diálogu komunitáriu, hahú iha loron 06 janeiru hosi munisípiu Manatuto, Baucau, Lautém, Viqueque, Manufahi, Ainaro, Covalima, Bobonaro, Liquiçá, no kinta ne’e tuir ajenda iha Ermera ho Aileu, maibé kansela ona iha Aileu.
Enkuantu, sexta (14/01) aban sei hala’o diálogu iha Dili no iha segunda (17/01) sei kontinua ba Oé-cusse durante loron tolu no ikus liu iha Ataúro.
Jornalista : Antónia Gusmão
Editora : Julia Chatarina
