DILI, 13 janeiru 2022 (TATOLI)–Vitorino da Costa hosi munisípiu Manifahi, nu’udar traballadór timor-oan ne’ebé serbisu iha Austrália liuhosi Seasonal Worker Programme (SWP), iha empreza Hillwood Berries, durante tinan-tolu uza opprtunidade di’ak hodi halibur osan.
“Durante serbisu iha Austália hahú tinan 2017 to’o 2021, ha’u konsege halibur osan hamutuk $50.000. Tinan kotuk tanba pandemia ha’u filafali mai Timór, maibé tinan ne’e ha’u hetan tan oportunidade hodi bá iha fulan ne’e nia laran,” Traballadór timor-oan hateten iha ETDA Fatuhada, kinta ne’e.
Notísia relevante: Traballadór timor-oan 23 sei aranka ba Austrália fulan ne’e
Antes ne’e, iha tinan 2017, nia hetan oportunidade ba serbisu ho durasaun fulan-neen no halibur osan $3.000.
“Momentu ne’ebá ha’u seidauk iha esperiénsia serbisu, entaun soe tempu barak iha halimar. Maibé ha’u kontente tanba maski ho osan oituan maibé ha’u lori mai sustenta ekonomia família. Nune’e desde tinan 2017 to’o 2021 hetan kontratu nafatin hosi Hillwood Berries tanba empreza ne’e haree ha’u serbisu ho responsabilidade no hatudu atitude di’ak,” nia akresenta.
Vitorino sei filafali bá serbisu iha Austrália, iha empreza nafatin iha loron 26 janeiru 2022.
“Ha’u agradese tebes ba Hillwood Berries tanba fó oportunidade serbisu dala-ida tan mai ha’u no ha’u ba ne’e la’ós tanba sistema família maibé empreza mak fó fiar ba ha’u atu ba serbisu,” nia dehan.
Hillwood Berries halo kooperasaun ho SWP hodi fó oportunidade ba ema serbisu tuir tempu loron ida ba ema-na’in 250, atu kuu ai-fuan.
SWP hanesan programa ida hosi Governu Austrália hodi fó serbisu ba illa pasífiku sira ne’ebé besik, ne’ebé sai fonte boot iha Hillwood Berries.
Jornalista : Arminda Fonseca
Editora : Julia Chatarina
