DILI, 14 janeiru 2022 (TATOLI)–Eskola Ensinu Sekundáriu Jerál (ESJ) 12 Novembru Becora no Ensinu Báziku Sentrál (EBC, sigla portugés) Cristál Balide, deside sei limita estudante iha matríkula foun, bazeia ba sirkulár ne’ebé fó sai ona hosi Ministériu Edukasaun Juventude no Desportu (MEJD).
Diretór Eskola ESJ 12 Novembru, Aniceto Pedro da Costa, apresia ho desizaun ministériu, ne’ebé limita estudante iha kada sala aula simu de’it ba Eskola Sekundáriu Jerál 45 no Tékniku Vokasionál 40.
“Ha’u hanoin limitasaun estudante 45 iha kada sala aula di’ak liu, maibé ha’u nia hakarak lalika fó to’o 45, sé bele tun tan ba 25 to’o 30 ne’e di’ak liu, atu nune’e ita bele buka kualidade hodi haree ba efetividade estudante no profesór sira,” Diretór Eskola hateten ba Agência TATOLI, iha Eskola ESJ 12 Novembru, Becora, sesta ne’e.
Notísia relevante: MEJD hasai sirkulár ho pontu importante tolu ba eskola hotu
Ho sirkulár MEJD, planu eskola halo matríkula ba estudante foun tinan letivu 2022 simu de’it estudante 500, tanba Eskola ESJ 12 Novembru iha sala aula 39, kompostu hosi turma dadeer no lorokaik, ne’ebé kada sala aula sei akumula de’it estudante 45.
Nune’e mós, Diretór Eskola EBC Cristal, Fernando Mesquita, informa, durante ne’e eskola laiha problema ho númeru estudante, tanba kada sala aula iha de’it estudante 25.
“Nu’udar eskola privada, ami hetan mós sirkulár hosi ministériu hodi kumpre, tanba ita sei realiza matríkula foun ba estudante sira tuir planu ne’ebé iha ona sei simu de’it estudante 200, tanba Cristal iha de’it sala aula haat, ho turma dadeer no lorokraik,” nia dehan.
Enkuantu, Diretór Jerál Edukasaun Ensinu MEJD, Luís Manuel da Costa Fernandes, hateten, sirkulár ne’ebé ministériu sosializa ona ba eskola sira laiha negosiasaun.
“Buat ne’ebé fó sai ona, ida-ne’e mak tenke kumpre, atu nune’e bele lori susesu ba prosesu ensinu aprendizajen sira,” nia tenik.
Jornalista : Tomé Amado
Editora : Julia Chatarina
