Estrada kilómetru 4 asesu ba Weluli Manas Viqueque ho kondisaun a’at
DILI, 14 janeiru 2022 (TATOLI)—Estrada atu asesu ba fatin turizmu Weluli Manas (bee manas lulik), lokaliza iha suku Waimori, postu Viqueque villa, munisípiu Viqueque, ho kondisaun a’at tanba ne’e difikulta vizitante atu vizita.
“Dalan hosi suku Bibileo liga ba fatin turizmu Weluli Manas kuaze kilómetru 4 ho kondiasuan grave tebes, tanba ne’e presiza halo normalizasaun, nune’e vizitante sira bele asesu ba fatin turizmu Weluli Manas. Ami haruka ona pedidu ba Ministériu Obra Públika (MOP) halo normalizasaun ba dalan ne’e,” Diretór Servisu Sekretaria Estadu Formasaun Profisionál no Empregu (SEFOPE) munisípiu Viqueque, Simões da Silva, hateten ba Agência TATOLI, via telefónika, sesta ne’e.
Notísia relevante: Tinan ne’e, MOP kontinua prioritiza reabilitasaun estrada no ponte
Ho kondisaun estrada, SEFOPE adia planu inaugurasaun fatin turizmu Weluli Manas, ne’ebé antes ne’e halo ona konstrusaun foun.
“Ami adia kalendáriu inaugurasaun ne’ebé tuir loloos monu iha loron 29 dezembru 2021, hodi hein normaliza dalan maka ita halo planu inaugurasaun,” nia akresenta.
Konstrusaun foun ba fatin turizmu ne’e hahú iha tinan 2021, ho durasaun fulan-neen, liuhosi kolaborasaun entre SEFOPE no Dom Bosco.
Fasilidade iha Weluli Manas iha pixina ba ema boot no labarik kiik, fatin deskansa ba vizitante, fatin troka, sanitária públika ida, mini kafetaria no mini merkadu.
Iha fatin ketak, Diretór servisu MOP Viqueque, Mario do Rego, rekoñese fatin turizmu ne’e presiza hadi’a, tanba ne’e komunika ona ba Institutu Jestaun Ekipamentu, Institutu Públiku (IGE, I.P) hodi normaliza.
“Parte IGE, I.P seidauk mai Viqueque hodi normaliza dalan hosi Bibileo bá Weluli Manas, maibé ita hein de’it tanba sira sei mobiliza ekipamentu pezadu mai,” nia akresenta.
Jornalista : Vitorino Lopes da Costa
Editora : Julia Chatarina
