AILEU, EKONOMIA, HEADLINE

SECoop fó pose ba estrutura kooperativa kréditu CU-FATUMA

SECoop fó pose ba estrutura kooperativa kréditu CU-FATUMA

Sekretáriu Estadu Kooperativa (SECoop, sigla portugés), Elizário Ferreira, hasain retratu hamutuk ho estrutura MU-FATUMA iha sede suku Maukasa, postu administrativu Lequidoe, munisípiu Aileu. Imajen Tatoli/Arminda Fonseca.

AILEU, 15 janeiru 2022 (TATOLI)—Sekretária Estadu Kooperativa (SEKoop), sábadu ne’e, fó pose ba estrutura Credit Union Fatuk-Merin Unidade Manutai (CU-FATUMA) na’in-15 ne’ebé kompostu hosi dirijente, Komité Kréditu Fiskalizadora, Komité Edukasaun, inklui Jestor.

Sekretáriu Estadu Kooperativa (SECoop, sigla Portugés), Elizário Ferreira, enkoraja estrutura sira katak knar ne’ebé sira simu ba oin badinas hodi hamosu ideia oioin atu kontribui ba kooperativa CU-FATUMA.

“Kréditu Union ne’e membru mak sai na’in ba kooperativa, nune’e membru aumenta barak osan mós aumenta barak. Tanba bazeia ba regulamentu kooperativa ne’e nu’udar klibur ema la’ós klibur kapitál, tanba ne’e ba oin servisu makaas nune’e ita-boot sira-nia kooperativa ne’e bele buras,” Elizário Farreira hateten iha sede suku Manukasa, Aileu.

Ko’alia kona-ba kooperativa la’ós de’it ba kréditu maibé mós bele haki’ak animál hanesan manu, fahi, karau, atu halo atividade ida-ne’e membru sira mak bele halo.

Husu ba membru kooperativa krédiku CU-FATUMA katak osan ne’ebé iha bele halo asaun ruma, nune’e osan sira-ne’e bele hodi halo movimentu no osan sira-ne’e labele rai de’it iha banku maibé sirkula iha kooperativa nia-laran.

“Tanba ita-boot sira membru 35 ho osan $18.000.00 ne’e la’ós toba iha ne’e, maibé tenke servisu makaas nune’e osan ne’e bele aumenta. Tanba bianhira kooperativa iha ona no osan barak, ba oin Governu mós bele empresta ita-nia osan bainhira sira presiza osan,” nia dehan.

Governante ne’e orienta CU-FATUMA hodi bele halo rejistu sira-nia kooperativu iha notariadu no sai membru mós ba federasaun Hanai-Malu, nune’e bele fasilita kooperativa sira hodi bele la’o ba oin.

Nia husu ba membru kooperativa-sira hakarak harii kooperativa hanoin oinsá mak servisu ho ekipa hodi lori kooperativa ne’e ba oin, maibé labele lori kooperativa nia naran tama polítika, tanba bainhira membru sira servisu makaas to’o hetan membru to’o 250 mak Governu sei apoiu osan $750.000 hodi harii CU-FATUMA nia sede rasik.

Prezidente CU-FATUMA, Juliana Imaculada, rekomenda ba SECoop ba oin kontinua fasilita formasaun akuntabilidade ba sira, nune’e kooperativa ne’ebé sira harii bele la’o ba oin.

“Ha’u rekomenda hela ba SECoop katak ami presiza tebes formasaun hodi apoiu ami, tanba ami ema foun foin hakat pasu ida ami mós seidauk domina kona-ba kontabilidade. Tanba osan ne’e problema boot ida mós, se ami laiha formasaun ami labele iha koñesimentu iha kontabilidade,” nia dehan.

Tanba formasaun sira-ne’e bele ajuda, estrutura Kooperativa sira, hodi bele lori membru sira atu bele hatane sá mak kooperativa no oinsá mak bele jere rasik osan di’ak iha kooperativa nia-laran.

“Ami ne’ebé harii la mai hosi edukasaun ne’ebé boot maibé mai hosi ensinu primaria, pre-sekundaria no ensinu sekundariu inklui mós balun la eskola,” nia dehn.

Kooperativa CU- FATUMA harii iha tinan 2012 no hamriik mesak iha tinan 2015 ho nia membru 35 no totál osan $18.000, nune’e iha loron 15 janeiru 2022 ofisiál hili estrutura foun hodi lidera CU-FATUMA ba oin.

Jornalista : Arminda Fonseca

Editór       : Cancio Ximenes

iklan
iklan

Leave a Reply

iklan
error: Content is protected !!