DILI,17 janeiru 2022 (TATOLI)— Xefe Banku Urjénsia Hospitál Nasionál Guido Valadares (HNGV), Vidál de Jesus, informa, daudaun ne’e HNGV laiha ona espasu ba pasiente sira, nune’e kontinua transferensia ba pasiente dengue ho kazu kaman ba Sentru Saúde Vera-Cruz atu hala’o tratamentu intensivu.
“To’o agora pasiente dengue nia númeru kontinua aas no mai nafatin iha HNGV, nune’e Konsellu Diretivu HNGV foti ona solusaun katak ba sira ne’ebé mak moras kamaan kontinua transfere hotu ba iha Vera-Kruz. Ita haree kazu todan mak halo atendimentu iha HNGV, tanba emerjénsia hanesan top referral iha Timor-Leste hodi simu pasiente hosi ospitál referál lima iha munisípiu no sentru saúde iha Dili laran,” Xefe Baku Urjénsia HNGV ne’e, hateten ba Agência TATOLI, iha knar fatin-Bidau, segunda ne’e.
Notísia relevante: Pasiente dengue sa’e ba 421, presiza rega susuk iha bairru risku
HNGV laiha espasu difikulta pasiente sira toba iha koridór hodi hetan atendimentu hosi profisionál saúde-sira.
“Ita nia pasiente liuliu labarik balun toba iha kadeira vizitante, balun inan-aman sira ho hamriik no balun tuur iha rai tanba kondisaun reál HNGV mak ida ne’e,” nia informa.
Nune’e, nia husu atu eleva kapasidade sentru saúde no ospitál referrál sira, iha setór rekursu umanu, fasilidade sira hodi miniza transferénsia pasiente ba hotu HNGV.
Iha semana datoluk ne’e, HNGV transfere ona pasiente 70-resin ba iha Sentru Saúde Vera-Kruz hodi halo atendimentu.

Iha biban hanesan, Família pasiente Ermenezes Lima Moniz, hateten maski profisionál saúde sira-nia atendimentu di’ak ba pasiente sira, maibé laiha espasu difikulta pasiente sira balun hetan tratamentu iha kadeira no balun tuur de’it iha rai.
“Fatin hotu nakonu no laiha kondisaun ne’ebé ema tuur de’it iha kadeira vizitante nian mak simu atendimentu hosi médiku sira. Kondisaun hanesan ne’e la serve, tanba ne’e tenke kria ona kondisaun di’ak no mós jestaun di’ak hodi fó atendimentu di’ak ba pasiente sira,” nia preokupa.
Entretantu, Ministériu Saúde (MS) relata, iha loron 16 janeiru númeru kazu dengue aumenta ba 440 no kumulativu óbitu hamutuk na’in-hitu.
Notísia relevante: HNGV laiha espasu sufisiente simu pasiente
Jornalista : Felicidade Ximenes
Editór : Florencio Miranda Ximenes