DILI, 19 janeiru 2022 (TATOLI)—Ekipa Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA, I.P), kuarta ne’e, halo inspesaun ba loja sira iha Dili laran hodi konfirma folin nesesidade bázika.
“Ohin ita halo inspesaun ba loja sira iha Dili laran hodi haree folin sasán nesesidade bázika sira iha loja tanba tuir informasaun katak daudaun ne’e folin sasán aumenta,” Inspetór Jerál AIFAESA, Ernesto Monteiro, iha loja Fortuna, Colmera, Dili.
Notísia relevante : Ekipa AIFAESA sei halo inspesaun bá munisípiu haat
Nune’e, durante inspesaun, ekipa la deteta folin sasán sa’e maibé konsidera normál.
“Hosi ita-nia inpsesaun la deteta empreza sira hasa’e folin nesesidade bázika sira hanesan foos, mina, no terigu, ne’ebé konsidera presu ho kategoria normál tanba tuir lei númeru 29/2011 normál, la liu 10-15 %,” nia akresenta.
Iha fatin ketak, Asistente Jerente, Loja Creative Furak, Yanty Zaka, hateten, iha verba balun hanesan mina tein sa’e oituan tanba impaktu COVID-19.
“Ami sosa no mai fa’an fali ho folin sa’e oituan maibé la barak ida ami hasa’e $0,25 de’it ba mina, foos no sira seluk hasa’e to’o $0,50, ne’ebé ami fa’an sasán ne’e normál la liu hanesan lei mensiona,” nia dehan.
Enkuantu, loja Fortuna hasa’e folin mina tein oituan tanba sira rasik mak fábrika.
Ekipa AIFAESA halo inspesaun ba loja Alfa Dili, Creative Furak, Fortuna, Perisos no seluk tan.
Jornalista : Arminda Fonseca
Editora : Julia Chatarina
