AILEU, EKONOMIA, HEADLINE, MUNISÍPIU

Autoridade Aileu husu Governu rezolve estrada ligasaun suku to’o postu

Autoridade Aileu husu Governu rezolve estrada ligasaun suku to’o postu

Mapa Munisípiu Aileu

AILEU, 21 janeiru 2022 (TATOLI)—Primeiru-Ministru (PM), Taur Matan Ruak, no membru Governu halo diálogu komunitáriu iha Aileu, sesta ne’e, ne’ebé iha biban ne’e maioria autoridade lokál hato’o preokupasaun kona-ba estrada ligasaun suku to’o postu administrativu.

Administradór postu administrativu Remexiu, Gastão Mendonça, husu Governu liuhosi Ministériu Obra Públika (MOP) atu rezolve kondisaun estrada tanba balun ho kondisaun grave tebes.

“Realidade ne’ebé enfrenta hanesan iha postu Remexiu hafoin akontese dezastre naturál iha tinan kotuk, Institutu Jestaun Ekipamentu, Institutu Públiku (IGE, I.P) normaliza ona, maibé foin lalais udan filafali no daudaun transporte sira ne’ebé tama-sai tula populasaun para kuaze semana ida tanba kondisaun estrada grave,” Administradór postu hato’o liuhosi sesaun pergunta no hatán iha diálogu komunitáriu iha munisípiu Aileu.

Aleinde ne’e, komunidade presiza estrada di’ak hodi ajuda transporta produtu ba merkadu munisipál no nasionál.

Notísia relevante: Desde independénsia to’o agora gasta biliaun $2 ba estrada kilómetru 2.000

Estrada liga postu Remexiu bá Lakló, kuaze labele asesu bainhira tempu udan no iha mós estrada ne’ebé halo konstrusaun kleur tebes, hahú kedas iha tinan 2017 to’o agora seidauk bele finaliza.

Nune’e mós, Xefe suku Namolesu, postu administrativu Liquidoe, Celestino Koli, hateten, estrada sira ho kondisaun grave.

“Liquidoe triste tebes tanba estrada liga munisípiu bá postu a’at totál no munisípiu bá Dili mós a’at, kuandu tempu udan maka ami labele ultrapasa mota boot tanba laiha ponte, tempu udan hanesan ne’e ami atu mai munisípiu susar tebes, ne’e difikulta ami atu lori sasán mai fa’an,” nia akresenta.

Estrada no ponte pakote 30 iha Aileu

Hatán ba preokupasaun ne’e, Ministru Obra Públika, Salvador Eugênio Soares dos Reis Pires, informa, iha tinan 2018 to’o 2021, iha estrada ho distánsia kilómetru 168 no ponte hamutuk projetu 30 iha munisípiu Aileu de’it, ne’ebé konstitui hosi estrada rurál hamutuk 23 kuaze kilómetru 140, manutensaun pakote 12 ba estrada rurál.

“Estrada balun sei iha prosesu aprovizionamentu iha Komisaun Nasionál Aprovizionamentu (CNA, sigla portugés), espera hotu ona tinan ne’e bele lansa tanba osan mai hosi tinan 2021, tanba fundu infraestrutura entaun multi-anuál katak, ne’ebé  kada tinan bele kontinua  maka estrada rurál liga Tuhularan-Manufolin, Dasoli-Fatubosa ho distánsia kilómetru 7,3, Trilolo-Laklo kilómetru 11,3, Laulara-Ornai kilómetru 2, Asumau-Aikorema kilómetru 2, Fahisohi-Fadablabloko kilómetru 9, Namunesu-Faturilai kilómetru 14, Fahisua-Dairluta kilómetu 5, Hatuhou-Liquiçá, Taliforleu-Kolohoho kilómetru 8, Seloi kraik-Halalmate, Raimansu-Fatubesi,” Ministru relata.

Enkuantu, ba projetu reabilitasaun, konkursu públiku fó sai ona iha tinan kotuk maibé rezultadu seidauk sai to’o agora, ne’ebé hein bainhira projetu konkursu ne’e CNA konklui ona mak fó ba MOP submete kontratu.

Iha mós estrada ongoing ida liga ho Laklo-Remexiu kilómetru 20, ne’ebé empreza halo ona maibé husik hela.

“Ne’e hanesan dezafiu ida tanba seguransa kontratuál katak la halo konkursu. Enkuantu ita hein planu fiksu sira iha tinan 2018 to’o 2021 atu IGE bele fó atendimentu lalais ba situasaun emerjénsia, maski la maioria atende tanba limitadu ekipamentu pezadu,” Governante ne’e subliña.

Iha tinan 2022, planu sira ne’ebé MOP hakarak hala’o liliu estrada, kompostu hosi trosu Laulara-Soloerema kilómetru 22,6, lansa tiha iha tinan 2019 no progresu atinje ona 50%.

Estrada munisipál kilómetru 29,5, trosu Kasnafar-Sarlala distánsia kilómetru 15, loloos ne’e tinan kotuk halo ona, maibé tanba kalamidade entaun situasaun terrenu muda maka’as ho estragu sira ne’ebé mak iha, nune’e presiza hadi’a fali kontestualiza dezeñu bazeia ba estragu sira ne’ebé mak iha.

“Daudaun Ajénsia Dezenvolvimentu Nasionál (ADN) halo hela verifikasaun no espera tempu badak Konsellu Administrasaun Fundu Infraestrutura (KAFI) apova hodi CNA loke konkursu hodi bele hahú tau aspal,” nia dehan.

Enkuantu, estrada Aileu-Seloi-Gleno ho distánsia kilómetru 17.5, Aileu-Liquidoe kilómetru 27.

Estrada urbana MOP tau iha planu maibé tenke halo uluk levantamentu dadus hafoin perkorre ba fundu ruma bainhira planu ne’e hotu.

Estrada rurál iha tinan 2022 ne’ebé hakarak halo reabilitasaun mak hanesan Aituri-laran Manufodi kilómetru 1, Taliforleu-Kololoho kilómetru 3,5, Seloi kraik-Halmabate kilómetru 3,5, Raimansu-Fatubesi kilómetru 5,2.

Ligadu ho ponte, iha ponte Mota ulun metru 120, ne’ebé hola parte iha estrada munisipál pakote 12, iha mós ponte iha suku Liurai-Aileu Liquidoe distánsia metru 600, ne’ebé ninia dezeñu konklui iha tinan 2021 no daudaun iha faze verifikasaun AND.

Populasaun munisípiu Aileu hamutuk 56.816 hosi uma-kain 10.868, kompostu hosi postu Aileu villa iha suku 12 no aldeia 65 ho totál populasaun 25.985 no uma-kain 5.233, postu administrativu Liquidoe suku hitu no aldeia 22 ho populasaun 7.730 no uma-kain 1.707, Remexiu suku ualu no aldeia 27, ho populasaun 15.528 no uma-kain 2.519, Laulara suku neen aldeia 25 ho populasaun 7.573 no uma-kain 1.409, nune’e totál suku iha Aileu hamutuk 33 aldeia 139.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!