DILI, 24 janeiru 2022 (TATOLI)–Ekipa téknika kompostu hosi Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK), José Agustinho da Silva no Diretór Ezekutivu TradeInvest Timor-Leste, Arcanjo da Silva, atualiza progresu projetu fibra óptika ba Primeiru-Ministru (PM), Taur Matan Ruak.
Biban ne’e, Ministru Joaquim informa, dadaun ne’e iha empreza haat hanesan SAKOM Timor-Leste, Metrolink, Moratelindo, no Telkomsel mak submete ona proposta ba TrandeInvest Timor-Leste, ne’ebé daudaun ekipa responsável sei analiza molok aprova.
“Ami mai atualiza situasaun no prosesu investimentu fibra óptika ne’ebé sei investe iha setór privadu iha kosta norte. Iha investidór potensiál boot haat ne’ebé hatama ona sira-nia proposta, maibé ekipa téknika sira halo analiza hela tanba proposta sira ne’e konstitui investimentu estratéjiku ba ita-nia nasaun,” Ministru relata hafoin reuniaun ho Xefe Governu, iha Palásiu Governu, segunda ne’e.
Daudaun ne’e, ekipa halo hela serbisu analiza téknika no administrativa, ne’ebé kuaze iha faze finál ona, tanba ne’e molok submetee ba Konsellu Ministru presiza atualiza ba PM hodi hetan orientasaun ruma.
“Normalmente investimentu ne’ebé ita halo, presiza halo analiza uluk ba dokumentu administrativu sira, ho ninia prosedimentu legál sira ne’ebé presiza atu kumpre, ne’ebé koordena ho ajénsia sira ne’ebé fó lisensa no faze sira ne’e liu ona, maibé falta dokumentu balun mak sei prosesa,” governante ne’e esplika.
Governu halo hela esforsu atu finaliza dokumentu legál sira, nune’e bele realiza ona tanba folin internet karun no kapasidade ladi’ak.
“Tanba ne’e, bainhira atu atrai investidór sira presiza kria infraestrutura kompetitiva tanba setór komunikasaun importante, tanba mundu agora adopta sistema dijitalizasaun. Tanba ne’e maka Timor-Leste hakarak ka lakohi presiza integra telekomunikasaun iha sistema globál,” nia akrsenta.
Polítika dada kabu submarinu hosi Darwin mai Timor-Leste nu’udar prioridade Governu Timor-Leste, ho kooperasaun Governu Canberra, ne’ebé mai ho objetivu atu eleva kapasidade rede internet iha rai laran tanba VIII Governu Konstitusionál iha programa Governu eletróniku, ne’ebé presiza liña internet lais.
Governu prevee millaun $41,588 ba verba Fundu Infraestrutura (FI) iha proposta Lei Orsamentu Jerál (OJE) tinan fiskál 2021 hodi halo akizisaun ekipamentu informátika kabu submarinu (fibra óptika).
Nune’e, iha empreza internasionál na’in-20 mak antes ne’e konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu fibra ótika.
Notísia relevante: Projetu ligasaun kabu submarinu iha ona CNA
Daudaun ne’e, banda internet internasioál ne’ebé maka Timor-Leste iha ho kapasidade 6 Gigabyte/segundu, ne’ebé fahe ba populasaun iha territóriu tomak ne’ebé asesu ba internet liuhosi operadór Timor-Telecom, Telkomcel no Telemor.
Governu liuhosi MTK aluga bandwith ho kapasidade 200 megabyte/segundu hodi oferese ba instituisaun Estadu hamutuk 140.
Maski nune’e, Governu iha ona planu atu atualiza hosi kapasidade 200 megabyte/segundu ba 1 gigabyte/segundu, atubele ajuda bainhira seidauk iha rede fibra óptika.
Jornalista : Antónia Gusmão
Editora : Julia Chatarina
