DILI, 24 janeiru 2022 (TATOLI)— Ministru Defeza, Filomeno da Paixão de Jesus, segunda ne’e, hasoru malu ho Primeiru Ministru hodi atualiza atividade defeza no FALINTIL-Forsa Defeza Timor-Leste (F-FDTL) iha área planeamentu estratéjiku.
“Primeiru Ministru bolu ha’u atu relata kona-ba atividade Defeza no F-FDTL iha área planeamentu estratéjiku liuliu haree liubá iha dokumentu estruturál sira no lei programasaun militár nian,” Ministru Defeza ne’e hateten ba jornalista sira hafoin ramata audénsia ho Xefe Governu iha Palasiu Governu, segunda ne’e.
Daudaun, ezbosu lei Programasaun Militár mak kontein edifikasaun ba F-FDTL ho Defeza durante tinan sanulu oin-mai.
“Lei ida ne’e sei submete mai iha Konsellu Ministru, iha tempu badak no sei apezenta ba iha Parlamentu Nasionál atu aprova, atu nune’e ba oin dezenvolvimentu F-FDTL sei guia hosi lei Programasaun Militár ne’e rasik,”Governante ne’e akresenta.
Ezekutivu ne’e mós relata ba Primeiru Ministru kona-ba lei Autoridade Marítima liga ho kestaun ezerse funsaun kontrolu ho di’ak.
“Área Oé-cusse no kosta súl inklui fatin seluk sira ne’ebé mak importante ita sei tau Kapitaun Portu, atu Autoridade Marítima bele ezerse funsaun kontrolu ho di’ak, maibé ita sei ko’alia konjuta iha fronteira Terrestre PNTL ho F-FDTL,” nia afirma.
Jornalista: Natalino Costa
Editór : Florencio Miranda Ximenes
