HEADLINE, JUSTISA, LEI

Jornalista sei la fó-sai ema-ne’ebé fornese dokumentu

Jornalista sei la fó-sai ema-ne’ebé fornese dokumentu

Jornalista Lusa, António Sampaio, uja faru metan no atual Prezidente Konsellu Administrasaun RTTL, E.P, José António Belo ‘Taraleu’. presta deklarasaun iha Tribunal Distrital ba publikasaun dokumentu kazu Topo Honis. Loron kuarta (26/01). Imajen Tatoli/Francisco Sony

DILI, 26 janeiru 2022 (TATOLI) – Tribunál Distritál Dili (TDD), kuarta ne’e kontinua hala’o julgamentu kontinuasaun ba kazu violasaun segredu justisa hodi rona sasin José António Belo no António Sampaio ne’ebé públika relatóriu Komisaun Justisa no Paz iha setembru 2020 liubá nune’e jornalista sei la fó-sai ema-ne’ebé fornese dokumentu ba relatóriu ne’e.

Eis Diretór Tempo Timor, José António Belo, hateten, prezensa iha tribunál atu kumpri notifikasaun hosi tribunál hodi presta deklarasaun relasiona ho kazu publikasaun relatóriu hosi Komisaun Justisa no Paz nian iha setembru 2020 ne’ebé públika iha mídia Tempo Timor.

“Ami la fó-sai fonte nia naran tanba tuir lei kódigu sívil no penál, konstituisaun repúblika, lei komunikasaun sosiál fó dalan ba iha jornalista sira atu proteje sira-nia sizilu profisionál,” António akresenta.

Relatóriu refere hateten KJP halo investigasaun ba kazu ne’ebé akontese iha Topo Honis Oescusse envolve eis padre Ricarhd Dasbach ne’ebé hakerek mós naran labarik lubun ne’ebé mak iha tempu hanesan Tribunál mós prosesa hela kazu refere.

Jornalista Ajénsia Lusa, António Sampaio sente kontente tanba Timor-Leste nia lei sira kona-ba liberdade imprensa no espresaun garante iha konstitusaun, kódigu penál, sívil no lei komunikasaun sosiál ne’ebé mak proteje direitu jornalista sira-nia inklui protesaun ba fonte informasaun.

“Importante tebes ba jornalista sira atu proteje nia fonte informasaun no lei sira iha Timor-Leste proteje,” António hateten.

Kazu refere rejista iha tribunál ho NUC 0278/20 CV/TDD aprezenta hosi Jurídiku-Sosiál Konsultoria (JU,S) ba Ministériu Públiku (MP) iha loron 29 setembru 2020 ho karáter urjénsia ne’ebé envolve mós sasin sira seluk hanesan eis Primeiru Ministru Xanana Gusmão, Arsebispu Metropolitana Bispu Dioseze Dili, Dom Virgílio do Carmo da Silva no eis Diretór KJP, Padre Hermínio de Fátima Gonçalves.

Enkuantu, kazu krime violasaun segredu justisa previstu iha artigu 292 kodegu penál ne’ebé deskonfia wnvolve eis diretór KJP, padre Hermínio de Fátima no argudu tolu seluk hanesan José Cardoso Moreira, Andre Gonçalves no Libania Martins Amaral.

Konteúdu hosi relatóriu refere kona-ba setór justisa iha Timor-Leste ne’ebé dadaun ne’e seidauk la’o ho loloos iha Timor-Leste, ne’ebé  deskreve mós kazu uma mahon Topu Honis, Oecuse, ikus mai divulga iha mídia sosiál maske konsidera nu’udar dokumentu konfidensiál.

Audiénsia ne’e prezide juiz sungulár Evangelino Belo, Ministériu Públiku reprezenta Prokuradór Matias Soares no argudu sira hetan asisténsia legál  hosi Advogadu privadu Miguel Faria.

TLPU solidariza

Timor-Leste Press Union (TLPU) solidariza jornalista ne’ebé sai sasin ba publikasaun relatóriu Komisaun Justisa no Pas.

Sekertáriu Jerál TLPU, Zezitu da Silva. Imajen Tatoli/Francisco Sony

Sekretáriu Jerál TLPU) Zezito da Silva, hateten, organizasaun jornalismu TLPU hamutuk ho membru hotu prenzansa iha Tribunal Distrital Dili (TDD) hanesan parte solidaridade ba jornalista na’in-rua tanba konsidera tribunál hamate liberdade espresaun no imprensa iha Timor-Leste ne’ebé Lei Komunikasaun Sosiál garante serbisu mídia no jornalista sira.

“TLPU konsidera notifikasaun tribunál ba jornalista na’in-rua hanesan ameasa boot ba liberdade imprensa, hakarak hamate liberdade imprensa no espresaun iha Timor-Leste,” Sekretáriu Jerál TLPU hateten iha TDD, Mandarin, Bebora, kuarta ne’e.

Tuir nia, jornalista la presiza prezensa iha tribunál tanba kumpri konstitusan repúblika, lei komunikasaun sosiál, kódigu étika ne’ebé mak jornalista sira loron-loron prátika hela liuhosi atividade jornalístika.

Papél mídia no jornalista sira garante iha Konstitusaun Republika Demokratika Timor-Leste (K-RDTL) iha artigu 40 kona-ba Liberdade espresaun no 41 kona-ba Liberdade imprensa no Lei númeru 5/2014 loron 19 novembru kona-ba Lei Komunikasaun Sosiál.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!