DILI, 27 janeiru 2022 (TATOLI)-Diresaun Nasionál Transporte no Terrestre (DNTT), planeadu iha tempu besik, sei instala tan semáforu ka ‘lampu merah’ tolu iha Dili ne’ebé lokaliza iha área Culuhun, Audian iha parte Klínika Foho Osan Mean no Elemloi Delta.
“Ami–nia planu atu instala tan lampu merah tolu iha Díli,” Diretór Nasionál Transporte no Terrestre (DNTT), António da Costa, informa ba jornalista sira iha ninia servisu fatin Balide Dili, kinta ne’e.
Notísia Relevante:Tinan Oin, DNTT Sei Aplika Tan “Lampu Merah” Tolu
Projetu instalasaun semáforu ne’e, DNTT aloka ona iha orsamentu jerál Estadu (OJE) 2021 ho montante $ 16.500.
Maibé la konsege implementa iha tinan kotuk tanba problema pandemia globál COVID-19.
Iha fatin hanesan Xefe Departamentu, Diresaun Nasionál Transporte no Terrestre (DNTT), Abel da Conceição, hateten razaun husi instalasaun semáforu iha fatin tolu ne’e atu evita mosu engrafamentu ba movimentu transporte públiku no privadu.
Durante ne’e, nia esplika mosu engrafamentu maka’as iha fatin tolu ne’e, tanba ne’e DNTT persiza halo instalasaun semáforu hodi evita engrafamentu iha kapitál Dili.
“Ne’ebé dadaun kompañia seida’uk bele halo, tanba sei hein ekipamentu hosi Indonézia. Nune’e, bainhira ekipamentu to’o ona iha Timor bele hahú instala ona,” nia afirma.
Kompañia Govnen STAR UNIPESSOÁL.LDA maka manán konkursu hodi implementa projetu instalasaun ne’e.
Entretantu, tuir dadus hosi DNTT katak semafóru iha díli laran hamutuk 12, kompostu hosi Bidau Lecidere, Estádiu Munisipál Dili, Ministériu Justisa, Eletrisidade de Timor Leste.E.P, Colmera, Katedrál, Jardim 05 de Maio, Palácio Prezidente, Timor Plaza, Delta, Bidau Tokobaru no Bemori.
Jornalista : Nelia Fernandes
Editór : Agapito dos Santos
