DILI, 27 janeiru 2022 (TATOLI) — Vise Ministru Administrasaun Estatál (MAE), Lino de Jesus Torrezão, hateten Konsellu Ministru (CM-sigla portugés) seidauk nomea Administradór Munisipál Ataúro, tanba ne´e, Sekretáriu Lúcio Boromeu de Araújo mak lidera provizóriu iha ne´ebá.
“Ministériu Administrasaun Estatál mak nomea tiha ona Sekretáriu Munisípiu Ataúru ne’ebé daudaun ne’e halo hela funsaun administrasaun iha ne’ebá, no hein Kosenllu Ministru atu halo nomeiasaun ba administrador“, hateten Vise MAE via-telefone ba Agência TATOLI, iha nia kna´ar fatin Caicoli.
Lino rekorda katak foin lais Primeiru-Ministru, Taur Matan Ruak, halo vizita ba Ataúro no sekretáriu mak lidera diálogu, enkuantu Administradór Ataúro to´o agora seidauk iha desizaun finál hosi Governu.
Governante ne’e hateten Ezekutivu nomea ona Ataúro-oan ne’ebé iha esperiénsia no kualifikadu tanba ne´e hein lori ba Konsellu Ministru atu halo aprovasaun.
Nomeasaun Autoridade Ataúro ho baze ba alterasaun datoluk Dekretu Lei númeru 3/2016, loron 16 marsu, ne’ebé altera hosi Dekretu Lei númeru 9/2018, loron 09 abríl ho númeru 54/2020, loron 28 outubru, ne’ebé korrije hosi deklarasaun retifikasaun Prezidénsia Konsellu Ministru númeru 4/2020, loron 16 dezembru. Ho diploma ne’e hatuur ho di’ak liután rejime espesiál ida ba organizasaun servisu Administrasaun Munisipál Ataúro.
Nune’e, iha loron 31 maiu 2021, Parlamentu Nasionál (PN) aprova Proposta-Lei Divizaun Adminsitrativa Territóriu ho unanimidade, nune’e, Loré ho Hatulia B sai postu, adminsitrativu foun no Ataúro sai munisípiu foun iha 01 janeiru 2022.
Dadus uma-kain iha Munisípiu Ataúro, totál hamutuk 2.679 kompostu hosi suku lima (5) hanesan Suku Beloi 448, Biqueli 691, Macadade 557, Maquili 541, Vila- Maumeta 442.
Jornalista : Osória Marques
Editór : Zezito Silva
