DILI, 01 fevereiru 2022 (TATOLI)—Loron 01 fevereiru hanesan tinan foun ba komunidade xineza, ne’ebé mundu tomak selebra inklui iha Timor-Leste, nune’e komunidade xineza no Asosiasaun Komersiál Komunidade Xineza iha Timor-Leste (ACCCTO, sigla portugés) selebra loron ne’e ho haksolok, hafoin tinan rua ikus laiha selebrasaun ruma tanba situasaun pandemia.
“Ohin tinan foun xineza nian, ami selebra desde horikalan to’o agora, ami haksolok tebes tanba tuir tradisaun ami-nian, loron ohin ne’e mak boot liu mai ami,” Prezidente ACCCTO, Kathleen Gonçalves, hateten iha ámbitu selebrasaun iha edifísiu Xina Maromak, Bairro Formosa, tersa ne’e.
Nune’e, nia enkoraja komunidade xineza hotu iha Timor-Leste, atu serbisu hamutuk ho asosiasaun ne’e hodi hametin liu tan fraternidade no amizade.
“Komemorasaun tinan foun ne’e ho símbulu ‘Tigri’, ne’ebé la signifika sorte menus ba sira, maibé sira tenke serbisu maka’as atubele atinje saida mak sira hakarak,” nia akresenta.
Biban ne’e, reprezentante komunidade xineza ne’e agradese ba Governu, liuliu ba Primeiru-Ministru, Taur Matan Ruak, tanba bele fó atensaun ba loron importante ne’e hodi hasai despaixu toleránsi pontu ba loron tomak.
“Ami agradese tebes ba Governu, tanba bele fó ona atensaun másimu ba loron ohin no ami kontente tebes tanba fó importánsia ba ami-nia loron,” nia dehan.
Tuir observasaun Agência TATOLI iha terrenu, iha resintu Xina Maromak Bairro Formosa, komunidade xineza halo movimentu bá-mai hodi halo sambaia tuir tradisaun.
Jornalista : Hortencio Sanchez
Editora : Julia Chatarina
