HEADLINE, INTERNASIONÁL, NASIONÁL

Cambodia husu TL organiza tan “Fact-Finding Mission” ba kultura no ekonomia

Cambodia husu TL organiza tan “Fact-Finding Mission” ba kultura no ekonomia

Ministra Negósiu Estranjeiru no Kooperasaun (MNEK), Adalgiza Albertina Xavier Magno. Imajen Tatoli/Francisco Sony

DILI, 02 fevreiru 2022 (TATOLI)– Ministra Negosiu Estranjeiru no Kooperasaun (MNEK) Adaljiza Albertina Xavier Reis Magno, informa Xefe Governu ba ASEAN nian rekomenda ba Timor-Leste atu organiza lalais “Fact-finding mission”   atu ekipa Sekretariadu ASEAN nian mai tan hodi haree ba faze sosiál, kultural no ekonomia nian atubele iha desizaun ruma ba adezaun-nian.

“Sira rekomenda mai ita oinsa mak bele organiza Fact-finding mission atu sekretariadu ASEAN nian mai no mós oinsa ita armonia lei komersia ninian no ita prepara ita nia-an didi’ak atu adezaun ba Organizasaun Mundial Komérsiu (WTO, sigla inglés) ho ida ne’e ita bele prepara-an di’ak liu kona-ba atividade komérsiu ho nasaun sira seluk liuliu iha ASEAN nian,” Ministra Adaljiza  hateten ba Agência TATOLI iha Palasiu Governu-Dili, kuarta ne’e.

Tuir estimativa tinan oin Timor-Leste bele adere ona hanesan membru, maibé depende ba ekipa ne’ebé atu rekolla dadus ka faktu sira iha Timor-Leste iha área sosiál, kulturál no ekonomia.

Tanba, Governante ne’e dehan, Primeiru Ministru Cambodia esforsu hela atu Timor-Leste bele adere ba ASEAN iha tinan oin, maibé depende ba preparasaun bainhira ekipa sekretariadu sira mai rekolla.

“Se ita preparadu tuir kalendáriu ne’e ita bele tama ona, maibe se ita seidauk preparadu ita tenke serbisu makas liután,” ezekutiva ne’e akresenta.

Iha tinan kotuk, ekipa Timor-Leste liuhosi virtuál ho ekipa Sekretariadu konsege armonia lei barak ona liuliu komérsiu no sosiu kultural nian,  maibé prepara mós iha parte rekursu umanu, tékniku kada Ministériu atu armoniza saida mak Timor -Leste presiza halo bainhira tama ona hanesan membru.

Entretantu Pedidu adezaun nian haruka ona iha tinan 2011, maibé to’o ohin loron Timor-Leste seidauk adere ba organozasaun rejionál ne’e.

Hahú kedas iha tinan 2011, faze preparasaun nian balun inklui tiha ona programa sira nivél nasionál ba sensibilizasaun instituisaun sira nian no sosiedade sivíl kona-ba matéria ne’e, harii pontu fokál sira no Sekretáriu Estadu ba Asuntu ASEAN nian, reforsa kompeténsia liuhusi formasaun no diálogu, partisipasaun iha Forum Rejionál no iha  sorumutuk rejionál no globál sira seluk, harii no reforsa Embaixada Timor-Leste nian iha nasaun hotu-hotu organizasaun nian.

Iha Governu nia laran halo ona introdusaun no aplikasaun kona-ba “Modelu sira ASEAN nian” (ASEAN Blueprints) iha dezenvolvimentu polítika nasionál nian garante hela katak, polítika foun sira no kuadru regulamentár sira  entegra tiha ona ho modelu sira hosi organizasaun nian.

Tinan ne’e, Ministériu Negósiu Estranjeiru no Kooperasaun sei konklui análize ida luan ne’ebé kona-ba polítika sira hotu no kuadru regulamentár atuál sira Timor-Leste nian, ne’ebé sei aprezenta ba Konsellu Ministrus hodi halo aprovasaun.

Elaborasaun dokumentu, ne’ebé koñesidu ho Memorandu kona-ba Rejime Komérsiu Esternu, hatudu to’o iha pontu ne’ebé mak Timor-Leste deside ona hodi prenxe rekezitu sira ASEAN nian. Iha ne’e mak sei define pasu sira ne’ebé maka tenke foti hodi alkansa konformidade kompleta ho buat ne’ebé prátika iha Asosiasaun.

Nune’e, Sekretariadu no membru sira organizasaun Nasaun Sudeste Aziátiku nian sei bele komprende ho di’ak estadu atuál enkuadramentu nasionál nian sira, hodi hatudu prontidaun no esforsu sira ne’ebé Timor-Leste halo ona to’o ohin loron, atu prepara-an didi’ak hodi asume obrigasaun sira nu’udar membru asosiasaun nian.

ASEAN kompostu hosi nasaun 10 mak hanesan, Cambodia, Indonézia, Laos, Vietname, Brunei Darusalam, Malázia, Singapura, Myanmar, Filipina no Thailandia.

Notísia relevante:  Ekipa “Fact-Finding Mission” ASEAN Sei Avalia TL Hafoin  surtu COVID-19

Jornalista : Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!