DILI, 02 fevereiru 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, informa nia parte sei hein rezultadu avaliasaun hosi ekipa SEKOMS nune’e Governu bele fó apoia ba programa “Naroman ba Suku” iha futuru.
“Ekipa halo avaliasaun ba programa naroman ba suku la’o di’ak, ne’ebé ha’u sei hein tan rezultadu avaliasaun atu ita kontinua apoia ka la apoia, ida-ne’e depende ba avaliasaun. Maibé jeralmente ha’u rona informasaun katak maiória sei funsioná no sentru informasaun sira sei hala’o hela sira-nia knar. Téknikamente tenke halo avaliasaun didi’ak, tanba ita hakarak kontinua apoia ne’e jestaun, relatóriu tenke di’ak no atividade tenke la’o. Ne’ebé, ha’u hein relatóriu finál, hafoin ne’e ita deside kontinua apoia ka lae,” Merício Juvinal dos Reis ‘Akara’ hateten ba Agência Tatoli, hafoin partisipa komemorasaun loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-21, iha Kuartel Jenerál Fatuhada, Díli, ohin.
Antes ne’e, Sekretáriu Estadu Komunikasaun Sosiál (SECOMS-sigla Portugés), Merício Juvinal dos Reis “Akara”, orienta ona ekipa tékniku hodi halo avaliasaun ba programa “Naroman ba Suku”, no bainhira l iha progresu no susesu di’ak, ida ne’e programa sei konsidera pilotu no SEKOMS bele ba fali suku seluk.
Governu liuhosi SEKOMS apoia programa “Naroman ba Suku” liuhosi orsamentu transferensia públika nafatin transfere osan ba sira atu sira funsiona, maibé depende ba avaliasaun hanesan ba sira-ne’ebé la halo knaar, SEKOMS la transfere osan tan ba sira.
Programa Naroman ba Suku nu’udar programa pilotu hosi VIII Governu Konstitusionál, ho objetivu mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.
Programa ne’e buka atu lori informasaun ba nível lokál besik ba komunidade iha suku hodi fó dalan ba komunidade atu hato’o sira-nia preukupasaun ka obstákulu sira-ne’ebé mak sira hasoru hodi aprezenta ba meiu komunikasaun nasionál sira.
Entretantu, Governu implementa ona programa Governu iha povu nia leet “Naroman ba Suku” iha suku 11, hanesan iha munisípiu Lautém, Viqueque, Baucau, Liquiçá, Bobonaro, Ermera, Manufahi, Aileu, Covalima no Ainaro.
Notísia Relevante: SEKOMS orienta ekipa tékniku halo avaliasaun ba programa “Naroman ba Suku”
Jornalista : Nelia Fernandes
Editór : Cancio Ximenes
