DILI, 03 fevereiru 2022 (TATOLI)—Vise-Ministru Administrasaun Estatál, Lino de Jesus Torrezão, informa planu kona-ba instalasaun fatin lixu hamutuk rihun 4 iha kapitál Dili, daudaun ne’e tama ona ba prosesu aprovizionamentu hodi loke konkursu ba kompañia atu implementa iha tinan 2022.
“Tanba ita seidauk hatene empreza ida-ne’ebé manan konkursu públiku ba monta lixeiru ne’e. Bainhira iha ona manan na’in parte aprovizionamentu sei haruka mai ami depois ita anúnsia hafoin implementa tanba ne’e sei hein hela,” Lino Torrezão hateten ba Agência TATOLI iha nia knaar fatin Colmera, Dili, sesta ne’e.
Notísia Relevante :2022: Governu hahú implementa sistema lixu ateru kontroladu
Tuir planu fatin lixeiru hirak ne’e sei instala iha fatin públiku hanesan merkadu, sentru saúde, eskola, dalan públiku, loza oin no komunidade sira-nia hela fatin iha Postu Administrativu Dom Aleixo, Na’in Feto, Cristo Rei no Vera Cruz.
Governu liuhosi Autoridade Munisípiu Dili prevee orsamentu jerál Estadu hodi atende lixu no transforma lixu ba resiklajen hamutuk millaun $2.3.
Entretantu, iha tinan kotuk, reprezentante povu iha uma fukun Parlamentu Nasionál liuhosi debate espesialidade ba proposta lei Orsamentu Jerál Estadu (OJE) 2022 aprova orsamentu adisionál $2.300.000 ba Autoridade Munisipál Dili hodi tau ba programa prioridade liliu kestaun jestaun lixu iha kapitál Dili ho votu a-favór 43, kontra 0 no abstensaun 15.
Proposta númeru 118 títulu Munisípiu Dili, kategória despeza bens no servisu ho programa kódiku 798 kona-ba bee no saneamentu, dotasaun inisiál $1,308,582 iha alterasaun aumenta $2.300.000, nune’e dotasaun finál sa’e ba $3,608,582.
Ho aditamentu rubrika ba orsamentu ne’e atu hala’o servisu rekolla no transporta lixu ka resíduos sólidos iha sidade Dili relativa hosi lote-1 zona leste no lote-2 zona oeste, halo dezeñu, konstrusaun, reabilitasaun ho jestaun ateru estasaun tratamentu resíduos iha Tibar, no mós forñesimentu ekipamentu ba rekolla resíduos iha Dili ba operasaun iha terenu. Lixeiru sira-ne’e sei tau dook hosi km 178.
Notísia Relevante :AMD sei fó koima ba infratór sira-ne’ebé soe lixu arbiru
Jornalista: Osória Marques
Editór : Agapito dos Santos
