DILI, 03 fevereiru 2022 (TATOLI)—Reabilitasaun irrigasaun liga ba natar Wedare, iha suku Luca, postu administrativu Viqueque villa, munisípiu Viqueque, daudaun ne’e paradu, difikulta agrikultór lokál hala’o atividade.
“Iha tinan 2021 autoridade lokál hamutuk ho komunidade hahú reabilitasaun, maibé paradu no to’o oras ne’e seidauk atinje 100% tanba udan boot, mota tun hodi difikulta komunidade finaliza irrigasaun. Ha’u rekoñese irrigasaun ne’e fó duni impaktu ba komunidade tanba sira labele halo natar hanesan tinan hirak liu ba kotuk,” Xefe suku Luca, Privato Guterres, hateten ba Agência TATOLI, via telefónika, kinta ne’e.
Notísia relevante: Autoridade Viqueque husu MAP hadi’a irrigasaun hodi hasa’e produsaun lokál
Antes ne’e, autoridade suku Luca, hato’o ona proposta ba organizasaun internasionál United Nations Development Programme (UNDP) hodi husu apoiu fundu atu halo reabilitasaun ba irrigasaun Wedare.
“Nune’e iha tinan kotuk, UNDP konsege apoiu duni materiál reabilitasaun ba ami hanesan fatuk, rai-henek, semente, besi, no sira seluk tan, aluga mós ekipamentu pezadu hanesan eskavadór hodi suru fatuk ne’ebé monu, inklui osan $3.000-resin hodi selu badaen sira,” autoridade suku haktuir.
Iha Fatin hanesan, Xefe aldeia Canlor, Manecas Baptista, hateten, reabilitasaun irrigasaun sentrál ne’ebé oferese bee ba natar Wedare to’o oras ne’e seidauk finaliza.
“Durante ami serbisu halo irrigasaun, hetan apoiu hosi UNDP,” nia akresenta.
Natar Wedare ho medida ektare 170 abandona desde tinan 2014, benifísia populasaun hamutuk 100-resin, hosi aldeia Canlor, Iramer, no Umalor, iha suku Luca.
Jornalista : Vitorino Lopes da Costa
Editora : Julia Chatarina
