DILI, 07 fevereiru 2022 (TATOLI)–Asosiasaun Halibur Matan Timor-Leste (AHDMTL) promove edukasaun inkluzivu ba profesór Eskola Bázika Católica (EBC) iha Manleuana atu garante ba estudante ema ho defisiénsia sira atu asesu ba edukasaun.
Direkór AHMDTL, Gaspar Afonso, hateten AHDMTL fó formasaun ba profesór sira atu atende ema ho defisiénsia ho hanesan, tanba ema ho defisiénsia barak mak sai hosi eskola impaktu sente lakomfortavel iha prosesu aprendizajen nia laran.
“Sira hetan diskriminasaun iha eskola no profesór balun ne’ebé mak la fó atensaun tanba hanoin baibain hela, maibé la fó atensaun mak sei hakanek ema ho defisiésia sira-nia laran. Tanba ne’e, ami fó formasaun ba profesór sira atu bele esplika ba estudante hotu no ho liafuan ne’ebé merese hateten bae ma ho defisiénsia sira,” Gaspar Afonso hateten iha EBC Manleuana, segunda ne’e.
Nia dehan, membru AHMDTL hamutuk 90-resin no iha ema balun ne’ebé mak la kontinua prosesu aprendizajen iha eskola maibé AHMDTL kontinua esforsu atu koordena ho Ministériu Edukasaun Juventude no Desportu (MEJD), tanba daudaun ne’e 10% hosi ema ho defisiénsia ne’ebé bele hala’o prosesu aprendizajen iha eskola sira.
Reprezentante Profesór EBC Manleuana, Ezequiel Santos Marques, hateten iha EBC ne’e iha estudante ho kondisaun defisiente ida mak akaba ona nia aprendizajen no sei iha na’in-rua mak kontinua hala’o hela aprendizajen iha eskola refere.
Hatán ba kestaun ne’e, reprezentante Xefe Departamentu Servisu Edukasaun Munisípiu Dili, Florentina Fernandes, hateten sira-nia parte sei esforsu atu aumenta sala-de-aula no infraestrutura ne’ebé sufisiente atu fasilita estudante sira.
“Buat hotu tuir prosesu no to’o agora ami laiha dadus kona-ba estudante ho defisiente iha Munisípiu Dili entaun ho programa edukasaun inkluzivu ne’e bele fó hanoin mai ami atu bele rekolla dadus,” nia dehan.
Jornalista : Osória Marques
Editór : Cancio Ximenes
