Anin estraga komunidade nia uma 12 iha Covalima
COVALIMA, 07 fevereiru 2022 (TATOLI)–Diretor Servisu Munisipál Protesaun Sivil Jestaun Dezastre Naturál, Quintino da Costa, informa iha fulan-janeiru nia rohan to’o iha inísiu fulan-fevreiru tinan ne’e, Servisu Munisípal Protesaun Sivil Jestaun Dezatre Naturál rejista anin sobu estraga komunidade nia uma hamutuk 12 iha Munisípiu Covalima.
“Hafoin akontesimentu, ami tuun ba terrenu hodi haree kondisaun direta iha terrenu durante anin makaas iha loron hirak ba kotuk rezulta anin estraga komunidade nia uma 12 iha munisípiu Covalima,” Diretór Servisu Munisípal Protesaun Sivil Jestaun Dezastre Naturál ne’e hateten ba Agência Tatoli, iha nia servisu fatin Suai Loro, segunda ne’e.
Nia informa, hosi totál 12 ne’ebé hetan estragu komopstu hosi postu administrativu Fatululik iha rua (2), Fohorem hamutuk uma neen (6) ne’e hosi suku Dato Tolu uma 4 no Fohorem Vila uma rua (2), postu administraivu Tilomar uma (ida) no postu administrative Zumalai uma rua (2).
“Ita halo intervensaun hodi identifika loloos motivu hosi uma monu hirak ne’e iha terrenu hatudu katak uma sira-ne’e monu tanba anin mak estraga. Kuaze uma sira-ne’e balun aat total no aat kmaan. Ohin, ekipa mós kontinua tun ba terrenu kontinua identifika anin sobu estraga komunidade nia uma,” nia dehan.
Maske ekipa identifika no rejista ona anin estraga komunidade nia uma 12 iha postu administrativu ne’ebé pertense ba munisípiu Covalima, to’o ohin loron seidauk hetan apoiu emerjénsia maibé iha posibilidade semana ne’e sei fó apoiu emerjénsia ba vítima sira
“Vítima hirak ne’e seidauk hetan apoiu emerjénsia tanba situasaun udan no anin makaas. Ita tuun ba terrenu uza motorizada la’ós ho karreta, nune’e ita seidauk fó apoiu emerjénsia. Posibilidade iha semana ne’e sei fó apoiu emerjénsia hodi fahe nesesidade bázika ba ítima sira,” nia dehan.
Vítima Anibal dos Santos hateten, anin no udan makaas iha fulan Fevreiru ne’e sobu estraga ninia uma no la konsege salva sasán uma laran tanba sira na’in-neen (6) salva an hodi konsege halai sai no agora daudun ne’e hela de’it iha viziñu sira-nia uma.
“Anin estraga ha’u-nia uma, sorte iha momentu ne’e ami na’in-neen (6) halai sai hosi uma laran mak uma monu tuun, tanba ne’e sasan iha uma laran ami la biban atu hasai no agora ami hela iha viziñu nia uma,” Anibal haktuir.
Jornalista : Celestina Teles
Editór : Cancio Ximenes
