MEJD seidauk tau prioridade prodús uniforme nasionál ba estudante
DILI, 07 fevereiru 2022 (TATOLI)—Ministériu Edukasaun Juventude no Desportu (MEJD), tinan ne’e seidauk foku atu kria uniforme nasionál tanba sei haree livru ba estudante sira.
“Ita hanoin kona-ba uniforme nasionál, maibé imi husu mai ha’u prioridade liu mak ida ne’ebé ha’u dehan importante liu mak livru,” Ministru Edukasaun Juventude no Desportu, Armindo Maia, hateten hafoin hasoru malu ho Primeiru-Ministru, Taur Matan Ruak, iha rezidénsia Farol, segunda ne’e.
Tuir Ministru, uniforme nasionál tama duni iha planu Ministériu, maibé ba kategoria datoluk to’o dahaat, bainhira livru sira konsege atinje ona.
“Bainhira ministériu atu prodús uniforme nasionál ba estudante sira, dahuluk presiza iha diskusaun entre ministériu, inan-aman no sosiedade sivíl atu haree kestaun ne’e hodi tau iha planu ne’ebé importante,” nia akresenta.
Tanba bainhira atu halo produsaun ba uniforme nasionál presiza orsamentu boot, tanba ne’e presiza iha konkordánsia entre entidade relevante no liu prosesu naruk.
“Inisiativa ne’e di’ak tebes ba eskola sira tanba bele ajuda identifika alunu ruma ne’ebé laiha disiplina. Maibé ministériu rasik mak seidauk hanoin to’o iha ne’ebá atu prodús lalais uniforme nasionál iha territóriu nasionál, tanba estudante barak iha área remota seidauk iha livru adekuadu hodi estuda, ne’e duni presiza iha diskusaun hamutuk hodi hatuur loloos prioridade ida molok atu foti desizaun,” nia dehan.
Enkuantu, planu atu prodús livru ba estudante bazeia ba kurríkulu tanba iha kurríkulu balun presiza renova fali, tanba ne’e MEJD tau prioridade atu finaliza kurríkulu, atu nune’e tinan oin bele tau ona orsamentu ba produsaun livru.
Jornalista : Tomé Amado
Editora : Julia Chatarina
