MS kontinua kontrata profisionál saúde 1.081 atende COVID-19
DILI, 07 fevereiru 2022 (TATOLI)— Governu liuhosi Ministériu Saúde kontinua kontrata profisionál saúde hamutuk 1.081 hodi hala’o atendementu ba prevensaun, vasinasaun no tratamentu médiku ba pasiente COVID-19.
Diretór Nasionál Rekursu Umanu iha Ministériu Saúde, Agusto Joaquim Pinto, hateten Porfisionál Saúde 1.081 ne’e kompostu hosi Médiku, Parteira, Enfermeiru no tékniku aliadu-sira.
“Ita halo kontratu ba profisionál saúde 1.081 atu apoia serbisu másimu atu halo intevensaun COVID-19 iha territóriu tomak,” Diretór Nasioná ne’e, hateten ba Jornalista sira iha knar fatin-Caicoli, segunda ne’e.
Notísia Relevante: COVID-19: kazu detetadu pozitivu 75 no ativu 532
Daudaun, Ministériu Saúde liuhosi Hospitál Nasionál Guidu Valadares (HNGV) no Servisu Saúde Servisu Munisípiu Dili hala’o hela mapamentu ba situasaun COVID-19, nune’e Governu bele deside estratéjia hodi responde ka resolve.
“Daudaun, kazu dengue sa’e maka’as pesoál sira ne’e mak hatan nafatin ba situasaun sira ne’e,” nia afirma.
Kazu pozitivu aktivu 532
Tuir dadus, iha Domingu (06/02), Ministériu Saúde, rejista kazu detetadu pozitivu COVID-19 foun 75, rekuperadu laiha no kazu ativu 532.
Nune’e, hahú 21 marsu 2020 to’o 06 fevereiru 2022 iha kumulativu kazu konfirmadu 20.240 no óbitu 122.
To’o horisehik, Laboratóriu Nasionál Saúde halo teste PCR 235 kompostu vijilánsia sentinela 10, rastreiu ba kontaku 34, rastreiu aleatóriu 139, viájen internasionál 52, follow up iha kuarentena laiha.
Totál teste PCR ne’ebé halo iha 05 fevereiru 2022 iha munisípiu-sira seluk, Rejiaun Administravu Espesiál Oé-Cusse no Ambeno (RAEOA) no Hospitál Nasionál Guido Valadares (HNGV) 88 hanesan Maubisse laiha, Maliana ualu Viqueque laiha, Suai laiha, Baucau laiha, Ermera laiha, RAeEOA laiha, HNGV 80, Lautém laiha, Vera Cruz laiha.
Populasaun elijível tinan 18 ba leten, ne’ebé simu ona vasina to’o iha loron 06 fevereiru 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili (88,0%) no kumulativu 2ª doze iha Dili (82,4%).
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 84,2% no simu ona doze daruak 70,9%.
Iha loron 06 fevereiru 2022, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu 15, baixa ho COVID-19 hamutuk 14, baixa tanba COVID-19 ida ho sintomas moderadu.
Notísia Relevante: COVID-19: kazu pozitivu foun 63 no ativu na’in-369
Jornalista: Felicidade Ximenes
Editór : Florencio Miranda Ximenes
