DILI, 07 fevereiru 2022 (TATOLI)—Prezidente Komisaun Funsaun Públiku (KFP), Faustino Cardoso, husu kolaborasaun serbisu ministériu no halo jestaun di’ak bainhira halo pedidu extensaun ba ajente administrasaun publika.
“Ami intende katak hosi Ministériu Edukasaun, Juventude no Desportu (MEJD), ami husu sira atu aprezenta avaliasaun dezempeñu, maibé la hatene to’o ona iha KFP ka seidauk, ida-ne’e mak ami husu ba sira atu oinsá enkamiña avaliasaun dezempeñu, tanba funsionáriu públiku ida, tantu permante mós iha avaliasaun dezempeñu, nune’e mós kontratu ajente administrasaun públika, mós presiza iha avaliasaun, ne’ebé extensaun ba sira ezije avaliasaun dezempeñu”, nia haktuir.
Notísia relevante: MEJD promete dezembru sei selu retroativu profesór 54 asume kargu diretiva
Inisiativa ne’e hodi hafasil mós ba pagamentu retroativu ba profesór sira ne’ebé asume kargu xefia iha eskola no servisu edukasaun munisipál sira.
Tuir Prezidente KFP, mudansa hosi funsionáriu kontratadu ba funsionáriu permanente tenki liu konkursu públiku.
“Laiha mudansa automátika hosi funsionáriu kontratadu ba permanente, atu sai permanente tenke liu konkursu públiku no atu hala’o konkursu públiku depende ba kada ministériu atu identifika vaga ne’ebé presiza atu mosu, ministériu mak tenki hato’o pedidu ba Primeiru-Ministru atu hetan aseitasaun kona-ba rekrutamentu bazeia ba nesesidade ministériu no bainhira hetan ona aseitasaun hosi Primeiru-Ministru, KFP serbisu hamutuk ho sira atu avansa ba rekrutamentu tuir nesesidade inklui ba profesór kontratadu sira,” Prezidente KFP hateten iha auditorium Ministériu Finansa (MF), Aitarak-laran, segunda ne’e.
Mudansa hosi funsionáriu kontratadu ba permanente tenki la’o tuir dalan, hahú hosi ministériu rasik, la’ós hosi kFP, tanba komisaun nia knaar atu fasilita de’it, maibé responsável prinsipál hahú prosesu ne’e iha ministériu idaidak.
Situasaun seluk kona-ba pesoál kontratadu sira tama kategoria ajente administrasaun públika, kabe ba instituisaun idaidak atu halo avaliasaun dezempeñu hafoin atu kontinua extensaun kontratu, depende polítika ministériu idaidak nian.
Bainhira ministériu deside hakarak extende tan kontratu, rekezitu ida mak ministériu haruka pedidu extensaun akompaña mós ho avaliasaun dezempeñu, hodi nune’e komisaun bele ajusta iha baze dadus no enkamiña pedidu pagamentu ba Payrol.
Jornalista : Antónia Gusmão
Editira : Julia Chatarina
