COVALIMA, 08 fevreiru 2022 (TATOLI)–Diretór Sekretariadu Tékniku Administrasaun Eleitorál (STAE) Covalima, Francisco Gusmão, informa STAE rejista ona eleitór hamutuk 47,961 ne’ebé sei partisipa iha eleisaun prezidensiál 2022.
“STAE hahú halo resensiamentu iha fulan juñu tinan 2021 to’o janeiru 2022 ne’e, STAE rejista ona eleitór provizóriu hamutuk 47,961 ne’ebé kompostu hosi mane 24,522 no feto 23,439. Ita seidauk hatene dadus loloos bainhira sira hosi asuntu eleitorál halo públikasaun,” Diretór STAE munisípiu Covalima ne’e hateten ba jornalista sira, iha nia knar fatin, Kampung Baru, tersa ne’e.
Sidaduan ne’ebé mak atu ezerse sira-nia direitu votu hahú sura hosi loron 19 fulan-marsu 2005 tanba sira konpleta ona tinan 17, maibé bainhira 19 marsu 2005 ba leten seidauk bele ezerse sira-nia votu tanba tinan seidauk to’o.
To’o oras ne’e, seidauk hatene votante sira-ne’ebé bele ezerse sira-nia direitu votu vota ka lae tanba seidauk iha lista votante hira mak atu ezerse sira-nia direitu votu iha eleisaun prezidensiál 2022.
Oras ne’e daudaun, ekipa STAE Covalima kontinua atende halo resesensiamentu eleitorál ba sidadaun sira-ne’ebé kartaun eleitorál lakon, tohar no aat hodi fasilita sira bele vota.
Bazea ba preparasaun eleisaun prezidensiál STAE estabelese sentru votasaun 80 no estasaun votasaun 92 iha postu administrativu ne’ebé pertense ba munisípiu Covalima.
Tuir kalendáriu ne’ebé mak dekreta ona hosi Prezidente Repúblika Francisco Guterres Lú Olo katak eleisaun prezidensiál realiza iha loron 19 fulan-marsu tinan 2022.
Daudaun ne’e, kandidatura na’in-17 mak rejista ona iha iha tribunál rekursu mak hanesan Anacleto Fereira, Angela Freitas, Antero Benedito da Silva, Armanda berta dos Santos, Constancio Pinto, Felizberto Araújo Duarte, Francisco Guterres Lú-Olo, Hermes da Rosa Correia Barros, Isabel Ferreira, José Manuel Ramos Horta, Lere Ana Timur, Luis Alves Tilman, Mariano Assanami Sabino, Martinho Gusmão, Milena Pires, Rogerio Lobato no Virgilio Guterres atu kompete iha eleisaun presidensiál 2022.
Jornalista : Celestina Teles
Editór : Cancio Ximenes
