VIQUEQUE, 08 fevereiru 2022 (TATOLI)–Sekretariadu Tékniku Administrasaun Eleitorál (STAE) munisípiu Viqueque identifika sentru votasaun hamutuk 92 no sub estasaun votasaun 110 iha aldeia 234 no suku 36.
“Ami mós prepara ona brigadista atu destaka ba sentru votasaun 92 iha suku 36 iha munisípiu Viqueque hodi halo koordenasaun ho autoridade sira ba realizasaun Eleisaun Prezidensiál iha loron 19 marsu 2022,” Diretór STAE, Humberto Fernandes, hateten ba Agência TATOLI, iha ninia knaar fatin, tersa ne’e.
Hafoin resensiamentu eleitorál ramata, brigada hosi STAE kontinua halo espozisaun lista eleitorál iha suku 36 hodi atende eleitór ne’ebé hakarak hadi’a dadus.
“Ami halo ona espozisaun lista eleitorál hahú iha loron 01 fevereiru no ramata ohin. Ami sei relata ba STAE nasionál hodi print lista eleitór ne’ebé definitivu (lista ikus),” nia akresenta.
Notísia relevante: STAE Viqueque rejista eleitór foun no tuan na’in-4.915
Aleinde ne’e, materiál sensitivu no naun sensitivu agora daudaun 80% rai ona iha armazen Viqueque, tanba ne’e STAE nasionál halo kontaktu ba Komandu Polísia Nasionál Timor Leste (PNTL) hodi asegura materiál sira.
“Horiseik ami halo koordenasaun ho Komadante PNTL Viqueque no Diretór liña ministeriál sira iha munisípiu Viqueque hodi husu tulun ba preparativu Eleisaun 2022 bele la’o ho susesu munisípiu ne’e,” Humberto Fernandes tenik.
Nune’e, PNTL sei fó seguransa másimu ba Eleisaun no parte liña ministeriál sira iha munisípiu Viqueque sei apoiu transporte hodi fasilita STAE tula materiál bá fatin sentru votasaun.
“Iha loron 14 fevereiru ami sei fó formasaun durante loron-tolu ba brigadista hamutuk na’in-92 hodi hasa’e koñesimentu asumi papél iha sentru votasaun sira,” nia dehan
STAE Viqueque agora daudaun sei hein dadus eleitór hosi STAE nasionál, ne’ebé iha tempu badak sei fó sai ba públiku inklui dadus eleitór finál.
Daudaun ne’e, STAE nafatin fó atendimentu ba sidadaun ne’ebé hakarak trata kartaun eleitorál ne’ebé lakon ka a’at.
Resensiamentu eleitorál iha munisípiu Viqueque hosi jullu 2021 to’o taka iha loron 14 janeiru 2022, rejista eleitór foun no tuan hamutuk na’in-4.915.
Jornalista : Vitorino Lopes da Costa
Editora : Julia Chatarina
