COVALIMA, 08 fevreiru 2022 (TATOLI)–Diretór Programa Nasionál Dezenvolvimentu Suku (PNDS) Covalima, Filipe Cardoso, informa iha tinan 2022 ne’e PNDS sei reabilita sede suku 12 no konstrui tan Uma Kbiit Laek (UKL) unidade 278 ba família vulneravél iha munisípiu Covalima.
Notísia Relevante: OJE 2022: munisípiu sira prioritiza programa 11
“Iha tinan 2022 ami prioridade konstrui Uma Kbiit Laek 278 nomós ho sub atividade barak, PNDS regular ba iha faze 3 siklu 4 no mós reabilita sede suku faze III nian ne’ebé sei implementa iha suku 12 iha Covalima,” Diretór PNDS Covalima ne’e informa ba Agência Tatoli, iha nia knar fatin, tersa ne’e .
Reabilitasaun ba sede suku 12 ne’e, PNDS sei konstrui iha postu administrativu Fohorem, Tilomar no Maucatar ne’ebé ho nia orsamentu hamutuk $144,000, no hosi orsamentu ne’e kada sede suku ida prevee orsamentu $12,000.
Aleinde reabilita sede suku, iha tinan ne’e, PNDS mós kontinua konstrui Uma ba kbiit laek iha Covalima, hetan distribuisaun Uma Kbiit Laek ba familia vulneravel unidade 278 ne’ebé sei implementa iha suku 30 no iha aldeia 86.
“Ami-nia ekipa sei halo sensibilizasaun iha munisípiu ramata ona no agora kontinua iha nivél suku hodi kontinua identifika familia vulneravél sira. Lista mai hosi aldeia sira-ne’ebé agora la’o hela iha territóriu Covalima,” nia informa.
Orsementu ba konstrusaun Uma Kbiit Laek 278 ne’e seidauk bele fó sai tanba agora sei halo preparasaun no prenxe akordu subsídiu anuál hafoin asina hosi xefe suku no hetan aprovasaun hosi administradór mak foin belé fó sai orsamentu.
“Orsamentu atu konstrui UKL unidade 278 iha Covalima ne’e, ami seidauk bele fó sai tanba ami agora iha preparasaun prenxe akordu subsídiu anuál bainhira xefe suku no fasilitadór finansa postu no hetan ona prova hosi administradór munisípiu Covalima foin hatene alokasaun orsamentu ba UKL ne’e,” nia esplika.
Programa PNDS konsidera nu’udar programa regulár ne’ebé ninia implementasaun iha nivél suku, 2022 programa ne’e hetan alokasaun orsamentu hamutuk tokon $8,2, husi totál ne’e aloka ba atividade fíziku hamutuk tokon $7,0 no atividade operasionál tokon $1,5 ba suku 207.
Programa Uma Kbiit Laek (UKL) konsidera nu’udar programa ida-ne’ebé ninia orientasaun atu kria kondisaun komunidade kbiit laek sira iha nivél aldeia.
Tinan 2022, programa ne’e hetan alokasaun orsamentu hamutuk tokon $12,8 no hosi totál ne’e aloka ba atividade fíziku hamutuk tokon $12,3 no atividade operasional ba suku 241.
Administrasaun munisipál Covalima
Administrasaun munisipál Covalima hetan despeza hosi OJE 2022 hamutuk tokon $3,8, aloka tuir liña orsamentu servisu sektoral no sekretariadu administrasaun munisipál nian akumuladu ona kustu ba merenda eskolár, alfabitizasaun, konsesaun eskolár $948.7, no ba projetu reapropriasaun PDIM rihun $353.6.
Covalima hetan alokasaun husi programa PNDS rihun $460 atu finansia atividade fíziku rihun $397.8 ba suku 12 no resta rihun $62, ba kustu operasional.
Alokasaun hosi programa UKL rihun $954.0 hodi finansia aktividade fíziku rihun $918.0 ba suku 18 no despeza operasional rihun $36.
Ba programa PMOHA iha 2022 seidauk hetan alokasaun no ba iha PDIM hetan alokasaun orsamentu rihun $353,6, husi totál ne’e, rihun $424.4 finansia ba projetu reapropriasaun neen.
Jornalista : Celestina Teles
Editór : Cancio Ximenes
