Vise-MAE fó pose ba administradór na’in-lima iha Covalima
COVALIMA, 08 fevereiru 2022 (TATOLI)–Vise-Ministru Administrasaun Estatál (MAE), Lino de Jesus Torrezão, hamutuk ho administradór munisípiu Covalima, Fransico de Andrade, fó pose ba administradór foun hosi postu administrativu lima (5) iha munisípiu Covalima.
Administradór postu administrativu lima ne’ebé simu pose mak postu administrativu Fatululik José Afonso, administradór postu Maucatar Constancio do Carmo Cardoso, administradór postu Fatumea Geraldo Orleans, administradór postu Fohorem Carlos Carvalho de Araújo no administradór postu administrativu Tilomar Bendito Maia.
Bazea ba desizaun Prezidente Comisaun Funsaun Públika númeru 4554/2022/CFP, loron 10 janeiru 2022, kona-ba nomeasaun funsionáriu servisu kargu xefia ba postu administrative sira, liu-hosi prosesu konkorsu interinu ne’ebé selesaun púr méritu ba mandatu tinan hat (4).
Vise-Ministru Administrasaun Estatál, Lino de Jesus Terrozão, husu ba administradór postu administraivu foun sira atu hala’o knar bazea ba dekretu-lei númeru 3/2016.
“Iha serimónia tomada de pose ida-ne’e, ita hakarak hanoin funsaun administradór postu administrativu ida-idak refleta no fó konfiansa hosi Governu sentrál ba administradór postu foun sira hodi hala’o kompeténsia tuir lei, liu-liu dekretu-lei númeru 3/2016 no atu hatutan politíka VIII Governu konstituisionál ne’ebé administradór sesante hala’o ona,” Lino de Jesus Torrezão hato’o liu hosi nia diskursu, iha salaun Administrasaun Covalima, Kampung Baru, tersa ne’e.
Governante mós apelu ba administradór foun hosi postu administrativu sira atu konsidera no serivu hamutuk veteranu no entidade relevante sira hodi hatutan servisu hosi munisípiu ba komunidade
Iha serimónia toma pose ne’e, vise-ministru hato’o parabéns ba administradór sesante hosi postu administrative lima (5) ne’ebé mak hala’o servisu durante pandemia COVID-19.
“Ha’u fó parabéns durante pandemia COVID-19 imi kontinua servisu nafatin no iha esperansa atu dezenvolve postu administrativu ba administradór foun, ha’u sei la hato’o parabéns maibé servisu di’ak ba imi hotu,” nia hateten.
Administradór Postu Administrativu Fatumea, Geraldo Orleans, promete iha nia mandatu sei fó prioridade ba dezenvolvimentu infraestrutura, hadi’a ekonomia, edukasaun no saúde.
“Ha’u-nia mandatu sei hakbi’it toos-na’in sira hodi hasa’e ekonomia tanba durante ne’e ekonomia la la’o, dezenvolvimentu infraestrutura setór edukasaun la la’o. Ami sei esforsu hodi garante kualidade edukasaun no saude,” Geraldo informa.
Nia esplika, iha postu administrativu Fatumea tanba kondisaun estrada aat entaun pesoál adminsitarsaun defisil atu atende lalais komunidade ne’ebé moras.
Atu atinje programa hirak ne’e administradór sei servisu hamutuk ho autoridade hotu no komunidade hakarak fó atendimentu di’ak, sira mós tenke fó informasaun atu fó apoiu ba sira.
“Ha’u garante iha ha’u-nia mandatu, ha’u sei halo mundansa iha postu administrativu Fatumea tanba ha’u iha prinsípiu ha’u hakarak serviu povu hosi halo mudansa iha postu administrativu Fatumea,” nia dehan.
Iha serimónia ne’e partisipa másimu hosi diretór munisipiu sira, autoridade lokál, administradór sesante no familia hosi administradór hosi postu administrativu lima iha munisípiu Covalima.
Munisípiu Covalima kompostu hosi postu administrative hitu mak postu administrativu Fatululik, Fatumean, Fohorem, Maucatar, Suai Vila, Tilomar no postu administrativu Zumalai.
Jornalista : Celestina Teles
Editór : Cancio Ximenes
