DILI, 09 fevereiru 2022 (TATOLI)–Diretór Servisu Edukasaun Dili (DSED), Carlito da Silva, konsidera Eskola Ensinu Sekundáriu Jerál (ESJ) 04 Setembru UNAMET Balide kontinua simu estudante la tuir sirkulár ne’ebé fó-sai hosi Ministériu Edukasaun Juventude no Desportu (MEJD).
“Tanba ne’e, estudante na’in-360 obrigadu tenke okupa fali sala sia seluk iha área Fatuhada,” Diretór hateten ba Agência TATOLI, iha ninia knaar fatin, kuarta ne’e.
Sirkulár ne’ebé MEJD fó sai, husu eskola atu halo limitasaun bainhira simu estudante foun, ne’ebé ba Ensinu Sekundáriu Jerál kada sala aula akumula de’it estudante 45 no Ensinu Sekundáriu Tékniku Vokasionál akumula estudante 40.
Notísia relevante: MEJD hasai sirkulár ho pontu importante tolu ba eskola hotu
Tanba la kumpre sirkulár ne’e, MEJD no Servisu Edukasaun Dili tenke esforsu harii fali eskola paralela ho sala sia hodi akumula fali estudante sira atubele partisipa iha prosesu aprendizajen ba tinan ne’e.
Iha sorin seluk, Diretór Eskola ESJ 04 setembru UNAMET Balide, Sérgio de Jesus, haktuir inskrisaun estudante foun ba tinan ne’e ho totál 1.200-resin.
“Ami hasoru difikuldade duni iha sala aula mak la sufisiente. Ita iha sala aula hamutuk 17, ne’ebé bele akumula estudante to’o de’it 775, tanba ne’e estudante balun la hetan fatin no parte ministériu oferese sala sia ba estudante sira atubele uza. Sala hirak ne’e sei lansa iha semana oin atubele hahú ona atividade aprendizajen,” nia dehan.
Jornalista : Tomé Amado
Editora : Julia Chatarina
