DILI, 09 fevereiru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Rezolusaun Governu, ne’ebé aprezenta hosi Vise Primeiru-Ministru no Ministru Planu no Ordenamentu, José Maria dos Reis, atu determina elaborasaun Planu Nasionál Ordenamentu Territóriu Timor-Leste (PNOT-TL).
“Planu nasionál ne’e sei elabora hosi Ministériu Planu no Ordenamentu, hosi intermédiu Diresaun Jerál Ordenamentu Territóriu no sai hanesan instrumentu ba planeamentu territoriál, ne’ebé define kuadru estratéjiku ba organizasaun no utilizasaun territóriu nasionál, lori objetivu, prinsípiu no estratejia sira ne’ebé Estadu asume no haree ba karaterístika jeográfika, ekolójika no ambientál iha territóriu, ba ninia dinámika demográfika, sosiál no ekonómika, inklui ba vokasaun funsionál no produtiva ba espasu diferente,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, kuarta ne’e.
Portavóz Governu dehan, liuhosi inisitiva ne’e sei estabelese orientasaun no konsidera iha elaborasaun ba instrumentu seluk sistema nasionál planeamentu no jestaun territoriál, inklui kompatibilizasaun polítika públika setoriál Estadu nian.
Nuneé mós, iha medida nesesáriu, hodi salvaguarda valór no rekursu ne’ebé sai hanesan interese nasionál.
Jornalista : Antónia Gusmão
Editora : Julia Chatarina
