DILI, 10 fevereiru 2022 (TATOLI)-–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exterior (DNEE), kinta ne’e, hahú ‘Pre Departure breafing ba traballadór timor-oan 86, ne’ebé sei arranka bá Austrália fevereiru no marsu tinan ne’e.
“Ohin ita fó breafing ba ita-nia traballadór timor-oan 86 ne’ebé prepara atu bá serbisu iha Austrália. Ita fó koñesimentu kona-ba kultura, ambiente serbisu, no disiplina iha Austrália, nune’e sira bele adapta ho kultura serbisu iha Austrália, liuliu sira ne’ebé ba servbsu labele ses hosi sistema, nune’e fó nafatin oportunidade ba seluk sira ne’ebé hein hela,” Diretór Nasionál Empregu Exteriór, Filomeno Soares, hateten, iha Salaun Senai, Becora.
Notísia relevante: Kandidatu traballadór timor-oan na’in-3.714 ba Austrália tuir teste lian inglés
Traballadór hirak ne’ebé bá serbisu iha Austrália liuhosi programa Seasonal Worker Programme (SWP) hamutuk 22 no Pacific Labour Scheme hamutuk 64, kompostu hosi grupu rua, dahuluk sei arranka iha fevereiru nia rohan no balun iha marsu.
“Ida-ne’e mak empregadór husu ita prepara, maibé bainhira iha teste médiku mak deteta iha falla balun karik, ita sei redús númeru ne’e,” nia akresenta.
Kona-ba rekezitu ba traballadór sira atu ba serbisu iha Austrália, depende hosi empregadór sira, maibé maioria husu atu iha koñesimentu iha lian inlgés, fíziku di’ak, tenke disiplina, no tenke simu vasina AstraZeneca kompletu.
“Ita-nia traballadór ne’e ba serbisu iha empreza rua, ba Seasonal Worker Programme mak Grape-Co no Pacific Labour Scheme mak Berry Pays,” Diretór tenik.
Iha fatin hanesan, Traballadór, Julito dos Santos Carvalho, sente kontente tanba hetan kontaktu hosi SEFOPE atu bá serbisu iha Austrália.
“Liuhosi Pacific Labour Scheme ne’e, ha’u sai hanesan funsionáriu permenante durante tinan-tolu, tanba ne’e agradese tebes ba oportunidade ne’ebé ha’u hetan,” nia dehan.
Traballadór 86 ne’e kompostu feto 30 no mane 58, ne’ebé ba traballadór SWP ho durasaun kontratu serbisu másimu fulan-sia no mínimu fulan-lima ba PLS ho durasaun tinan-tolu.
Jornalista : Arminda Fonseca
Editora : Julia Chatarina
