MSSI-MS vizita Sentru Apoiu Saúde São João de Deus Laclubar
DILI, 11 fevereiru 2022 (TATOLI)—Vise-Primeiru Ministru no Ministra Solidaridade Sosiál no Inkluzaun (MSSI), Armanda dos Santos Berta, hamutuk ho Ministra Saúde (MS), Odete Maria Freitas Belo, kinta-ne’e, hala’o vizita ba Sentru Apoiu Saúde São João de Deus hodi haree direta kondisaun ema moras mentál sira-nian iha postu administrativu Laclubar, munisípiu Manatuto.
“Ha’u ohin hamutuk ho Ministra Saúde ho ekipa tomak mai vizita iha fatin ida-ne’e, ho objetivu atu ami bele haree no rona direta kondisaun fízika ho preokupasaun, no mós servisu atendimentu hosi ita-nia responsável ho doutór sira iha fatin ida-ne’e, ba maluk defisiénsia mentál sira,” Vise-Primeiru Ministru ne’e hateten iha komuikadu imprensa ne’ebé mak Agência TATOLI asesu, sesta ne’e.
Tanba Estadu Timor-Leste fó importánsia ba ema ho defisiénsia hodi asegura katak sira mós partisipa iha dezenvolvimentu nasionál, ne’ebé atu sai inkluzivu ka lakohi atu husik ema balun ba kotuk, inklui ema ho defisiénsia.
Governante ne’e hateten, MSSI nu’udar instituisaun ida-ne’ebé halo servisu liu-liu iha área sosiál nian ne’ebé durante ne’e apoiu fundus ba organizasaun no instituisaun sira hotu.
Tan ne’e, ba-oin sei kontinua hodi hametin liután kooperasaun servisu no apoiu orsamentu, nune’e instituisaun sira bele halo atendimentu ne’ebé di’ak liután ba sidadaun sira hotu.
Sentru Apoiu Saúde São João de Deus Laclubar, daudaun ne’e akumula ema ho defisiénsia mentál hamutuk na’in-11 ne’ebé kompostu hosi feto na’in-haat (4) no mane na’in-hitu (7), ne’ebé mai hosi munisípiu oioin.
Kada tinan, MSSI prevee orsamentu hamutuk $70,000, nune’e hodi bele apoiu ba Sentru Apoiu Saúde São João de Deus, odi fasilita sira-nia servisu iha atendimentu ba ema ho defisiénsia mentál sira.
Aleinde ne’e, governante na’in-rua ne’e hamutuk ho komitiva, kontinua hala’o vizita madre sira iha Sentru da Paz Santa Isabel iha Manatutu Villa, no iha vizita ne’e partisípa no akompaña mós hosi administradór munisípiu Manatuto, administradór postu administrativu Laclubar, Komandante PNTL Laclubar nomós hetan apoiu seguransa hosi PNTL Manatuto.
Jornalista : Osória Marques
Editór : Cancio Ximenes
