Ekipa susesu kandidatu PR Armanda Berta estabelese estruturu iha Baucau
BAUCAU, 12 fevereiru 2022 (TATOLI)–Ekipa susesu nasionál kandidatu Prezidente Repúblika (PR) hosi partidu Kmanek Haburas Timor-Oan (KHUNTO), Armanda Berta dos Santos, estabelese no fó pose ba ekipa susesu inklui lansamentu sede iha munisípiu Baucau.
Koordenadór ekipa susesu munisípiu Baucau, Angelo Angelino Freitas Correia, agradese ba ekipa susesu nasionál ne’ebé ohin hakat ona to’o rejiaun ne’e hodi fó pose ba estrutura iha ámbitu preparasaun Eleisaun Prezidensiál iha 19 marsu 2022.
“Estrutura munisípiu Baucau iha kompromisu hakarak halibur malu hamutuk atu lori kandidatu Armanda Berta dos Santos, asume kargu nu’udar Prezidente Repúblika ba períodu 2022-2027,” Koordenadór hateten iha sede ekipa sussesu, Tirilolo, villa nova, sábadu ne’e.
Notísia relevante: Kandidata Armanda Berta hahú rejista iha TR
Nune’e, estrutura ekipa susesu Baucau sei halo esforsu tomak atu halo preparasaun, hahú kampaña eleitorál ne’ebé tuir planu sei hahú iha loron 04 marsu ho tipu rua, hanesan kampaña nakloke no door to door, to’o nível postu admistrativu neen, suku no aldeia, inklui la’o tuir kada uma-lisan iha munisípiu Baucau.
Koordenadór konsidera, kandidatu Armanda Berta nu’udar feto potensiál ne’ebé respeita kultura Timór no tane maluk feto sira.
“Feto mós matenek no bele lori Timor-Leste ba mundu, inklui banati tuir Konstitusaun, katak defende igualdade jéneru,” Angelo akresenta.
Nune’e mós, Prezidente ekipa susesu nasionál, Marito Magno, hateten, atividade ohin importante tebes, atu ekipa iha munisípiu bele hala’o serbisu ne’ebé iha koordenasaun ho autoridade munisípiu, Komisaun Nasionál Eleisaun (CNE, sigla Portugés), no Sekretariadu Tékniku Administrasaun Eleitorál (STAE), hodi bele iha komunikasaun di’ak bainhira realiza kampaña eleitorál.
“Ekipa ida-ne’e sei hala’o knaar hodi mobiliza forsa polítika iha munisípiu Baucau,” Marito tenik.
Métodu serbisu mak sei hala’o serbisu to’o área remota tuir partidu KHUNTO nia militante no simpatizante.
Iha sorin seluk, Marito konsidera Armanda Berta nu’udar feto potensiál, tanba ne’e nia husu atu feto maluk iha Baucau atu fó apoiu.
“Ami iha konfiansa ida katak munisípiu Baucau sei fó surpreza ba povu Timór tomak, ami fiar katak ami-nia votu iha Baucau sei maka’as,” nia otimista.
Portavós Asosiasaun Mulher Juventude Klibur Intelektuál Profisionál (AMJKIP) Baucau, Celestina da Costa Nunes, deklara apoiu kandidatu Armanda Berta, tanba haree hanesan feto simples no tane a’as interese nasionál inklui kumpre Konstitusaun.
Asosiasaun ne’e mós konsidera Armanda Berta hakribi ba korrupsaun, kolusaun no nepotizmu, ne’ebé bele estraga futuru nasaun no tane a’as kultura nu’udar Timor-Leste nia identidade.
Iha loron 31 janeiru 2022, ekipa susesu Armanda Berta kompleta dokumentu hodi rejista kandidatura PR iha Tribunál Rekursu ho apoiante hamutuk 8.641
Jornalista : Natalino Belo
Editór : Julia Chatarina
