DILI, 14 fevereiru 2022 (TATOLI)–Asosiasaun Nasionál Múzika Timor-Leste (ALMAMOR) ho kolaborasaun Bolu Malu Art & Production, segunda ne’e, lansa inisiativa halo álbum kompilasaun hodi promove knananuk artista timor-oan no konvida sidadaun proteje no prezerva natureza Timor-Leste.
Prezidente ALMAMOR, Henrique do Rosário, hateten, inisiativa ne’e tanba asosiasaun konsidera múzika nu’udar meiu importante no bele lori mudansa pozitivu.
“Ita-nia kompilasaun ne’e tanba ALMAMOR nu’udar asosiasaun nasionál ba múzika iha Timor-Leste, tau interese boot ba asuntu meiu ambiente iha rai doben, ne’ebé ho objetivu seluk atu promove artista foun sira bele halo gravasaun profisionál no promove sira iha múzika nasionál no internasionál, inklui reforsa indústria múzika iha Timor-Leste,” Henrique do Rosário, hateten iha Fundasaun Oriente, segunda ne’e.
Notísia relevante: Almamor Hala’o Kongresu Ba Datoluk
Atividade sei halo durante loron-16, hahú 14 fevereiru to’o 01 marsu, ne’ebé ALMAMOR simu ona múzika sira hosi artista timor-oan sira, tantu banda múzika, individuu, no grupu.
“Programa prezerva no proteje natureza iha Timor-Leste ne’e sei finaliza ho lansamentu álbum kompilasaun ‘Knananuk ba natureza Timor-Lorosa’e’, ne’ebé aprezenta múzika iha loron 30 abríl 2022,” nia akresenta.
Múzika kompilasaun ne’e presiza sanulu, nune’e ba oin sei fó oportunidade ba artista timor-oan sira ne’ebé iha múzika kona-ba proteje natureza nian bele hatama iha asosiasaun.
Bainhira artista sira ne’ebé hatama múzika, karik la liu selesaun, artista sira-nia obra nafatin rejistu no arkiva iha ALMAMOR.
Tanba ne’e bainhira hatama múzika tenke submete hotu ho deskrisaun, hanesan múzika ne’e sé mak hakerek, aranjamentu, no hosi grupu ka individuu tenke inklui hotu.
“Ita-nia programa ida-ne’e realiza tanba serbisu hamutuk Bolu Malu Art and Production, ne’ebé sira mak sei implementa programa desde inísiu to’o ramata,” nia tenik.
Enkuantu, fundu atu realiza programa ne’e hosi Institutu Franca ho montante €4.000, liuhosi asina kontratu iha loron 15 dezembru 2021 iha tinan kotuk.
Iha fatin hanesan, juri ba kompilasaun múzika proteje natureza Timor-Leste, Eva Pereira, konsidera programa kompilasaun múzika ne’e di’ak hodi bele fó mensajen ba komunidade.
“Daudaun iha mudansa klimátika, ita-nia ambiente bele muda maibé komunidade barak mak seidauk hatene loloos oinsá kuidadu ita-nia natureza. Ha’u fiar katak liuhosi múzika ne’e sei fó hanoin ba komunidade hodi kuidadu ambiente,” nia dehan.
Juri ba programa ne’e mak hanesan mak Eva Pereira, Mito Freitas no Melly Galaxy.
Jornalista : Arminda Fonseca
Editora : Julia Chatarina
