DILI, 14 fevereiru 2022 (TATOLI)–Eskola Ensinu Sekundáriu Jerál (ESJ) 05 Maiu Becora prepara tan sala aula provizóriu tolu ba estudante 135, tanba sala la sufisiente atu akumula estudante partisipa iha aula prezensiál.
Tuir Diretór ESJ 5 Maiu, Manuel Verdial, tinan ne’e estudante iha eskola ne’e la barak hanesan tinan kotuk.
“Agora iha de’it estudante 1.700, tanba kumpre desizaun Ministériu Edukasaun Juventude no Desportu (MEJD), ne’ebé husu eskola sira tenke normaliza sala aula. Ita simu estudante antes ona sirkulár mak ministériu husu ita atu redús estudante hosi nível Ensinu Sekundáriu Jerál ba 45 iha kada sala aula no tékniku vokasionál 40,” Diretór eskola relata ba Agência TATOLI, iha ninia knaar fatin, Becora, segunda ne’e.
Notísia relevante: MEJD hasai sirkulár ho pontu importante tolu ba eskola hotu
Tuir Dirijente eskola, númeru estudante ne’ebé eskola simu kontinua barak, tanba eskola la foti desizaun atu limita, tanba ne’e foti risku hodi simu hodi nafatin buka meiu kria sala aula.
Sala tolu ne’ebé eskola prepara maka sala ida provizóriu uza palku eskola no sala rua uza sala profesór nian.
“Sala profesór fahe hotu ona, hela de’it sala ida iha palku maka foin didin kalen, hafoin sei nahe tan ninia laran halo didi’ak atu estudante sira uza hodi estuda mós di’ak. Tuir planu prosesu ensinu aprendizajen sei hahú loron 15 fevereiru 2022,” nia akresenta.
Enkuantu, Adjunta Diretora Eskola ESJ 05 Maiu, Maria dos Santos, deklara katak tinan ne’e sira loke inskrisaun foun ba estudante 10o ano hamutuk 568, hosi totál estudante ne’e eskola fahe ba programa estudu rua hanesan Siénsia Teknolojia estudante 253 no Siénsia Sosiál Umanidade 315.
Eskola mós fahe estudante ne’ebé iha ba turma 13 mak hanesan Siénsia Teknolojia iha turma neen no Siénsia Sosiál Umanidade iha turma hitu.
“Limitasaun númeru estudante ne’ebé iha bazeia ba desizaun Ministériu Edukasaun Juventude no Desportu. Pur enkuantu, sala ba estudante sira ladún sufisiente, maibé eskola iha meiu atu koloka estudante sira tuir fasilidade ne’ebé eskola iha,” nia dehan.
Jornalista : Tomé Amado
Editora : Julia Chatarina
