NASIONÁL, HEADLINE, KAPITÁL, Uncategorized

Estudante Hadomi Natureza promove atividade ambiente no kampaña lixu

Estudante Hadomi Natureza promove atividade ambiente no kampaña lixu

Xefe Lojístika Grupu ESHANA, Alberto da Costa. Imajen TATOLI/Francisco Sony

DILI, 14 fevereiru 2022 (TATOLI)—Grupu Estudante Hadomi Natureza (ESHANA) hosi Universidade Nasionál Timor-Leste (UNTL), Fakuldade Ekonomia no Jestaun, segunda ne’e, komemora loron ‘Domin’ ka  Valentine Day ho atividade promosaun ambiente no kampaña lixu iha kapitál Dili.

Grupu ESHANA realiza kampaña hodi prezerva no konserva ambiente ne’ebé saudável, iha estrada ibun Palásiu Governu nian, segunda (14/02). Imajen TATOLI/Francisco Sony

Xefe Lojístika ESHANA, Albertino da Costa, hateten, atividade limpeza jerál realiza ona desde semana kotuk, sesta to’o sábadu no ohin halo kampaña lixu.

“Objetivu kampaña ne’e atu fó hanoin ba motorista sira iha kapitál Dili, bainhira lori karreta no motor, halai labele soe foer arbiru, tanba baibain kondutór sira halai ho transporte, sira soe foer arbiru, la tau nia-fatin,” Xefe Lojistika, hateten, iha Palásiu Governu oin.

Notísia relevante: Adapta ekonomia verde, Timor-Leste tenke opta konseitu dezenvolvimentu sustentável ambiente

Aleinde ne’e, grupu estudante sira hanoin atu hala’o atividade ne’e tanba bainhira tama loron domin, ema haree kestaun hotu ba domin, tanba ne’e ESHANA iha hanoin atu promove atividade hirak ne’e.

“Ita-nia komunidade maioria soe foer la tau tuir nia-fatin, entaun ami selebra loron domin ho atividade, promosaun ambiente nian,” nia dehan.

Grupu ESHANA realiza kampaña hodi prezerva no konserva ambiente ne’ebé saudável, iha estrada ibun Palásiu Governu nian, segunda (14/02). Imajen TATOLI/Francisco Sony

Atividade ne’e hala’o ho voluntarizmu atu eduka komunidade kuidadu ambiente iha kapitál Dili, tanba bainhira tempu udan, Dili sempre akontese inundasaun tanba menus konsiénsia hosi komunidade soe foer arbiru.

“Ha’u husu ba komunidade iha Dili laran, liuliu joven foin sa’e sira, bainhira komemora loron domin tenke hatudu ita-nia domin ba malu liuhosi domin ba natureza ho kuidadu ambiente no soe lixu iha nia fatin,” nia tenik.

Grupu ESHANA rasik harii iha tinan 2009, daudaun iha ona membru 270, kompostu hosi feto 170 no mane 100.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!