EKONOMIA, HEADLINE

Joven na’in-794 tuir teste eskrita lian inglés ba programa PLS

Joven na’in-794 tuir teste eskrita lian inglés ba programa PLS

SEFOPE halo abertura teste lian inglés ba traballadór sira ne’ebé atu bá serbisu iha Austrália liuhosi programa PLS, iha salaun STVJ, Kamea Becora, tersa (15/02). Imajen TATOLI/Francisco Sony

DILI, 15 fevereiru 2022 (TATOLI)–Sekretaria Estadu Formasaun Profisionál no Empregu liuhosi Diresaun Nasionál Empregu Exteriór (DNEE), tersa ne’e, realiza teste eskrita lian inglés ba kandidatu traballadór hamutuk na’in-794, ba programa Pacific Labour Scheme (PLS).

Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

Diretór Nasionál Empregu Exteriór, Filomeno Soares, hateten, programa ne’e atu mobiliza traballadór bá serbisu iha Austrália ho durasaun tinan-tolu.

“Molok bá, traballadór sira tenke iha nível koñesimentu di’ak iha lian inglés, entaun ohin ita halo teste ba sira, ne’ebé finaliza ona formasaun iha sentru formasaun akredidatu sira,” Diretór ne’e informa iha salaun Sentru Treinamentu Vokasionál Joventude (STVJ), Kamea Becora.

Notísia relevante: Kandidatu traballadór timor-oan na’in-3.714 ba Austrália tuir teste lian inglés

SEFOPE halo abertura teste lian inglés ba traballadór sira ne’ebé atu bá serbisu iha Austrália liuhosi programa PLS, iha salaun STVJ, Kamea Becora, tersa (15/02). Imajen TATOLI/Francisco Sony

Kandidatu traballadór hamutuk na’in-4.004 aplika ba vaga teste eskrita via online, maibé iha prosesu selesaun dokumentu iha ema na’in-794 mak prienxe kritéria no liu, kompostu hosi mane 517 no feto 277.

“Rekrutamentu ba teste eskrita lian inglés ne’e, la signifika kandidatu sira atu bá serbisu ona iha Austrália, maibé hanesan faze preparasaun hodi hatama ba lista work ready pool SEFOPE, nune’e bainhira empregadór hosi Austrália presiza, ita prontu atu haruka traballadór bá serbisu,” nia akresenta.

Nune’e, nia enkoraja joven ne’ebé tuir teste, karik la pasa labele lakon vontade, maibé husu atu nafatin hakbesik-an ba sentru formasaun hodi aumenta koñesimentu no kapasidade, inklui haree tuir fali oportunidade tuir mai, enkuantu ba sira ne’ebé pasa iha iha selesaun ne’e tenke kuidadu saúde no hadook-an hosi krime.

kandidatu traballadór ne’ebé partisipa iha teste, Alexandrino Duarte. Imajen TATOLI/Francisco Sony

Iha fatin hanesan, kandidatu traballadór ne’ebé partisipa iha teste, Alexandrino Duarte, agradese ba Governu liuhosi SEFOPE ne’ebé kria ona programa PLS ne’e hodi fó serbisu ba timor-oan sira.

“Ita haree situasaun agora, joven barak mak dezempregu, entaun liuhosi programa ne’e, ita bele fó oportunidade ba joven sira,” nia tenik.

Kandidatu traballadór sira tuir teste durante loron-rua, hahú ohin no ramata aban no iha loron 18 fevereiru sira ne’ebé pasa kontinua ba ezame orál.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!