DILI, 16 fevereiru 2022 (TATOLI)—Sekretária Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), kuarta ne’e, realiza seremónia despedida no asina deklarasaun ho família inklui traballadór na’in-58, ne’ebé sei aranka bá Koreia Súl iha loron 18 fevereiru.
Biban ne’e, Sekretáriu Estadu Formasaun Profesionál no Empregu (SEFOPE), Alarico do Rosário, hateten, parte rua asina deklarasaun hanesan kompromisu ida katak família prontu husik ona nia membru, nune’e bainhira mosu problema, parte rua iha hotu responsabilidade atu rezolve.
“Ida-ne’e hanesan tradisaun ida ba ita, bainhira ita-nia traballadór sira atu bá tenke asina deklarasaun no fó motivasaun ba sira, oinsá konfiansa ne’ebé ema fó ba ita, bainhira bá serbisu iha ema-nia rai ho disiplina no tuir regulamentu ne’ebé iha, liuliu labele sees hosi sistema, nune’e ema kontinua fó fiar ba ita,” Sekretáriu Estadu informa ba Agência TATOLI, iha ninia knaar fatin, Becora.
Notísia relevante: Traballadór timor-oan 39 arranka bá Koreia Súl
Traballadór na’in-58 ne’ebé asina deklarasaun ne’e, sei ba serbisu iha área rua, kompostu hosi peska na’in-31 no fábrika na’in-27,” nia akresenta.
Iha fatin hanesan, Diretór Nasionál Empregu Exteriór, Filomeno Soares, hateten, iha tinan 2022 SEFOPE konsege haruka ona traballadór timor-oan maizumenus hamutuk 150.
“Ita prepara traballadór de’it, tanba kouta ne’ebé Governu Koreia Súl haruka mai ne’e determina ona kada tinan sira presiza traballadór 500, maibé ita bele haruka liu númeru ida-ne’e,” nia dehan.
Traballadór timor-oan ne’ebé konsege ona bá Koreia Súl, hahú hosi tinan 2009 to’o agora hamutuk 4.024.
“Hosi númeru ne’e, daudaun traballadór ne’ebé sei iha Koreia Súl hamutuk 3.000 no hosi númeru ne’e, na’in-400 mak ses hosi sistema, ne’ebé Governu sei halo esforsu, nune’e bele lori sira mai Timor-Leste, tanba ses hosi sistema ne’e risku ba sira-nia vida,” Diretór tenik.
Jornalista : Arminda Fonseca
Editora : Julia Chatarina
